آئندہ سال 8 فروری ہونے والے انتخابات کی تیاریاں زور شور سے جاری ہیں، مختلف سیاسی جماعتوں اور آزاد امیدواروں کی جانب سے کاغذات نامزدگی حاصل کرنے کا سلسلہ بھی جاری ہے۔
کاغذات نامزدگی حاصل اور جمع کرانے کے دوسرے روز کئی بڑے سیاستدانوں نے فارم حاصل اور جمع کرا دیے، تاہم اب کاغذاتِ نامزدگی جمع کرانے کی تاریخ میں توسیع کردی گئی ہے۔
اب تک مزید جن امیدواروں نے کاغذات نامزدگی حاصل اور جمع کرائے ان میں کراچی سے شکور شاد نے این اے 239 سے کاغذات نامزدگی جمع کرادیے۔
قومی اسمبلی کی مخصوص نشست اور ڈی جی خان میں جنرل نشست کے لیے پی ٹی آئی رہنما زرتاج گل کے کاغذات نامزدگی جمع کرائے،
مردان سے اےاین پی کے امیرحیدر ہوتی نے این اے 22 اور پی کے 58 سے۔ سابق وزیر مملکت علی محمد خان نے این اے 23 سے۔ پی ٹی آئی کے عاطف خان نے این اے 22 اور پی کے59سے کاغذات جمع کرا دیے۔
اس کے علاوہ مٹیاری سے صدر ن لیگ سندھ بشیرمیمن نے پی ایس 56 ہالہ ، پی ایس 44 شہدادپور سے اور ان کےبھائی بشیرمیمن نے پی ایس 56 ہالہ ، پی ایس 44 شہدادپور سے نامزدگی فارم جمع کروا دیے۔
چمن سے پی بی 51 سے پی ٹی آئی کے جلال خان سعدی، کراچی ملیر کے حلقوں این اے 231 پر پی پی کے عبدالحکیم بلوچ، این اے 229 اور 231 پر ن لیگ کے قادر بخش کلمتی نے فارم جمع کرائے۔
پی ٹی آئی رہنما اشرف گجر نے این اے 46اور47سے کاغذات نامزدگی جمع کروائے، ن لیگ کے شیخ انصر عزیز نےاین اے 47 اور 48 سے کاغذات نامزدگی جمع کرائے، حافظ نعیم نے این اے 250سے کاغذات نامزدگی جمع کرادیے۔
اس کے علاوہ جماعت اسلامی کے مسلم پرویز این اے 249سے کاغذات نامزدگی جمع کرائے جبکہ سیالکوٹ سے خواجہ آصف کے ایک قومی ،2 صوبائی حلقوں سے کاغذات نامزدگی جمع کرائے گئے۔
استحکام پاکستان پارٹی کے سربراہ جہانگیر ترین نے لودھراں کے حلقہ این اے 155 سے اور عون چوہدری نے پی پی163سےکاغذات جمع کرادیئے، مسلم لیگ ن کی طرف سے نذیرچوہان نے پی پی 162 کے کاغذات نامزدگی جمع کرائے۔ راولپنڈی سے حنیف عباسی نے این اے 56 سے کاغذات نامزدگی جمع کرادیے۔
پی ٹی آئی رہنما پرویز الٰہی اور چوہدری شجاعت کے بیٹے سالک حسین نے این اے 64 سے کاغذات جمع کرائے، گجرات سے ن لیگ کے امیدوار علیم اللہ وڑائچ کے کاغذات نامزدگی بھی جمع کرادیے گئے۔
واضح رہے کہ الیکشن کمیشن نے گزشتہ روز انتخابی ضابطہ اخلاق جاری کیا تھا جس میں کہا گیا تھا کہ جماعتیں دستور میں عوامی حقوق کو سر بلند رکھیں گی۔ امیدوار قانون نافذ کرنے والے اداروں سے مکمل تعاون کریں گے۔ ملکی خود مختاری، سالمیت اور سلامتی کے خلاف کوئی اظہار، عدلیہ اور افواج کی شہرت کو نقصان پہنچانےوالا عمل نہ کریں۔
