اسلام آباد: ایم بی بی ایس داخلہ ٹیسٹ نتائج کے حوالے سے پیش رفت سامنے آ ئی ہے، اسلام آباد ہائیکورٹ نے نومبر 2022 کا ایم ڈی کیٹ رزلٹ 2 سال کے لیے موزوں قرار دے دیا۔
تفصیلات کے مطابق اسلام آباد ہائی کورٹ نے کہا ہے کہ نومبر 2022 کا ایم ڈی کیٹ رزلٹ نومبر 2024 تک کے لیے موزوں ہے، یہ فیصلہ اسلام آباد ہائیکورٹ کے جسٹس میاں گل حسن اورنگزیب نے جاری کیا ہے۔
عدالتی فیصلے میں کہا گیا کہ پٹیشنر لائبہ رؤف نے نومبر 2022 میں ایم ڈی کیٹ پاس کیا، جب پٹیشنر نے ایم ڈی کیٹ پاس کیا اس وقت قانون کے مطابق رزلٹ 2 سال کے لیے موزوں تھا۔
عدالتی دستاویز کے مطابق پٹیشنر نے پی ایم ڈی سی کے 14 جولائی 2023 کے پبلک نوٹس کو چیلنج کیا، پی ایم ڈی سی نے نوٹس میں کہا تھا کہ 2022 کے پاس ایم ڈی کیٹ پر 2023 میں داخلہ نہیں ملے گا۔
عدالت نے قرار دیا کہ 2021 کی ریگولیشنز کے مطابق نومبر 2022 کے ایم ڈی کیٹ نتائج 2 سال کے لیے موزوں ہیں، بعد میں کیے جانے والے ایڈمنسٹریٹو فیصلے سے پٹیشنر سے یہ حق واپس نہیں لیا جا سکتا، اس لیے پٹیشنر کا ایم ڈی کیٹ رزلٹ نومبر 2022 سے نومبر 2024 تک موزوں ہوگا۔
عدالت نے حکم جاری کیا کہ اس کیس میں پٹیشنر کا جو خرچ آیا ہے وہ بھی پی ایم ڈی سی ادا کرے گی، پٹیشنر کی طرف سے خلیق الرحمان سیفی ایڈووکیٹ نے کیس کی پیروی کی۔
