کراچی: ایف آئی اے نے بینک صارف کے اکاؤنٹ کا صفایا کرنے والے سابق بینک ملازم کو 10 سال بعد گرفتار کر لیا۔
تفصیلات کے مطابق ڈپٹی ڈائریکٹر کمرشل بینکنگ سرکل کراچی علی مراد کی زیر نگرانی ایک کارروائی میں فراڈ میں ملوث نجی بینک کے سابق ملازم فہد محمد محسن کو گرفتار کر لیا گیا۔
ایف آئی اے ترجمان کا کہنا ہے کہ ملزم فہد محمد محسن نے بینک صارف کے اکاؤنٹ سے 42 لاکھ روپے غبن کیے تھے، ملزم نے دوران تعیناتی جعل سازی سے صارف کی چیک بکس جاری کروائیں۔
- Advertisement -
ترجمان کے مطابق ملزم نے چیک بک کا استعمال کرتے ہوئے صارف کے اکاؤنٹ سے 42 لاکھ نکلوائے تھے، ملزم کے خلاف سال 2013 میں مقدمہ درج ہوا تھا، تاہم وہ 10 سال سے روپوش تھا۔
ایف آئی اے کا کہنا ہے کہ گرفتاری کے بعد فہد محمد محسن سے تفتیش کا آغاز کر دیا گیا ہے۔
