کراچی: شہر قائد کے علاقے لانڈھی میں اتفاقیہ گولی دو ٹریفک اہلکاروں کے سینے سے آر پار ہونے کے بعد ایک اہلکار جاں بحق ہو گیا۔
تفصیلات کے مطابق لانڈھی تھانے میں اتفاقیہ گولی چلنے سے 2 اہلکار زخمی ہو گئے تھے، جن میں سے ایک زخمی اہلکار دوران علاج جناح اسپتال میں دم توڑ گیا۔
ڈی آئی جی ٹریفک اقبال ڈارا کے مطابق جاں بحق اہلکار کی شناخت فہمید کے نام سے ہوئی ہے، جو ٹریفک سیکشن شاہ فیصل ضلع کورنگی میں تعینات تھا، جب کہ زخمی اہلکار گل شیر سیکشن کورنگی صنعتی ایریا میں تعینات ہے۔
ڈی آئی جی کے مطابق اہلکار علی احمد ڈی ایس پی ٹریفک سیکشن لانڈھی کا پستول لے کر بیرک میں آیا تھا، زخمی اہلکار گل شیر کے ہاتھ سے پستول سے گولی چلی، ایک ہی گولی فہمید اور گل شیر دونوں کے سینے سے آر پار ہوئی، یہ واقعہ صبح ساڑھے 7 بجے کے قریب پیش آیا۔
ڈی آئی جی نے بتایا کہ دونوں اہلکار ٹریفک سیکشن تھانہ لانڈھی کے بیرکوں میں رہائش پذیر تھے، واقعے کی اطلاع پر ایس ایس پی کورنگی حسن سردار اور ایس پی کورنگی ٹریفک سیکشن فرح امبرین نے جناح اسپتال کا دورہ کیا۔
ڈی ایس پی ٹریفک لانڈھی جاوید کے گن مین علی حسن کو حراست میں لے لیا گیا ہے، واقعے سے متعلق مزید شواہد اکھٹے کر کے تفتیش شروع کر دی گئی ہے۔
