اسموگ میں اضافے کی وجوہات سامنے لانے کیلئے انٹرنیشنل کنسلٹنٹس سے اسٹڈی کرانے کا فیصلہ کیا گیا ہے۔
تفصیلات کے مطابق ان دنوں لاہور میں اسموگ کی وجہ سے نظام زندگی کو رواں دواں رکھنے میں کافی مشکلات کا سامنا ہے۔ اسموگ سے چھٹکارا حاصل کرنے کے لیے دوست ملک کی مدد سے لاہور میں مصنوعی بارش بھی برسائی جاچکی ہے۔
اسموگ میں اضافے کی وجوہات جاننے کے لیے چینی ماہرین ماحولیات کی خصوصی ٹیم اگلے ہفتے لاہور آئے گی۔
نگران وزیراعلیٰ پنجاب محسن نقوی نے کہا کہ افسوس ہمارے پاس اسموگ بڑھنے کی وجوہات کی مستند ریسرچ نہیں ہیں۔ قیاس آرائیوں سے اسموگ پر قابو نہیں پاسکتے۔
محسن نقوی نے کہا کہ مستند ڈیٹا کے ذریعے ہی اسموگ سے نمٹنے کے لیے جامع اقدامات کیے جاسکتے ہیں۔
نگران وزیراعلیٰ پنجاب نے کہا کہ عوام بیماریوں سے بچنے کیلئے ماسک لازمی پہنیں۔ سڑکوں پر پانی کے چھڑکاؤ کے بجائے مٹی صاف کریں۔
انھوں نے کہا کہ سڑکوں کو اس طرح دھویا جائے کہ مٹی پانی کے ساتھ بہہ جائے۔ غیرمعیاری پٹرول اور ڈیزل فروخت کرنے والوں کیخلاف کارروائی کریں۔
