الیکٹرک کاریں بنانے کے لیے دنیا بھر میں شہرت رکھنے والی امریکی کمپنی ٹیسلا کی کاروں میں بڑا نقص سامنے آگیا، چین سے 16 لاکھ کاریں واپس منگوائی جائیں گی۔
تفصیلات کے مطابق امریکی کمپنی ٹیسلا کی کاروں میں نقائص کی وجہ سے تصادم کے دوران گاڑیوں کے دروازے کھل سکتے ہیں، جو حفاظتی نقطہ نگاہ سے کار میں بیٹھنے والوں کے لیے بہت خطرناک ہے۔
اہم حفاظتی خدشات سامنے آنے کی وجہ سے ٹیسلا نے چین سے اپنی 16 لاکھ سے زیادہ گاڑیاں واپس منگوانے کا اعلان کیا ہے۔
اسٹیٹ ایڈمنسٹریشن فار مارکیٹ ریگولیشن کے بیان کے مطابق 26 اکتوبر 2022 سے 16 نومبر 2023 تک تیارکردہ درآمدی ماڈل ایس اور ایکس کی 8 ہزار 538 گاڑیوں کو فوری طور پرواپس منگوایا جارہا ہے۔
بیجنگ میں قائم کار ساز کمپنی کی برانچ نے اس مسئلے کو حل کرنے کے لیے واپس منگوائی گئی کاروں کے لیے اوور دی ایئر سافٹ ویئر اپ ڈیٹ فراہم کرنے کا وعدہ کیا ہے۔
واپس منگوائی جانے والی گاڑیوں میں 26 اگست 2014 سے 20 دسمبر 2023 کے درمیان تیار کردہ تقریبا 16 لاکھ 10 ہزار درآمد شدہ ماڈلز، ایس، ایکس، تھری اور مقامی طور پر تیار کردہ ماڈل تھری اور وائی گاڑیاں بھی شامل ہیں۔
