اسلام آباد: وفاقی وزیرِ خزانہ اسحاق ڈار نے کہا ہے کہ حکومت نے مذاکرات کے دروازے کبھی بند نہیں کئے ، جس کے جواب میں شاہ محمود قریشی نے کہا کہ ماضی کا تجربہ کچھ زیادہ اچھا نہیں رہا۔
اسلام آباد میں نیوز کانفرنس کرتے ہوئے اسحاق ڈار کا کہنا تھا کہ حکومت تحریکِ انصاف کے ساتھ خلوص نیت سے مذاکرات کی حامی ہے، اسحاق ڈار کے اس بیان پر اے آر وائی سے خصوصی گفتگو میں تحریکِ انصاف کے سینئر وائس چیئرمین شاہ محمود قریشی نے کہا کہ ماضی کا تجربہ اچھا نہیں رہا، انکا کہنا تھا کہ وہ غیر رسمی بات چیت کو مثبت پیشرفت سمجھتے ہیں۔
تحریکِ انصاف کے رہنماء جہانگیر ترین نے اے آر وائی کو بتایا کہ مذاکرات کے پچھلے دور میں وزیرِاعظم کےاستعفے پربات رکی تھی، اب عمران خان اس مطالبے سے دستبردار ہوچکےہیں، انھوں نے کہا کہ عدالتی کمیشن نے کہا کہ دھاندلی نہیں ہوئی تو تحریکِ انصاف دھرنا سمیٹ لے گی اور دو ہزار اٹھارہ کا انتظار کرے گی۔
