لاہور: 9 مئی واقعات میں گرفتار نہ ہونے والے ملزمان کے خلاف بھی کریک ڈاؤن شروع کر دیا گیا۔
تفصیلات کے مطابق لاہور پولیس کی آپریشنز اور انویسٹی گیشن ٹیموں کو نو مئی واقعات میں گرفتار نہ ہونے والے ملزمان کی گرفتاری کے لیے ٹاسک سونپ دیا گیا۔
پولیس حکام کا کہنا ہے کہ 9 مئی واقعات کی تحقیقات میں مزید 382 ملزمان کی گرفتاری مطلوب ہے، 282 اشتہاریوں کی گرفتاری کے لیے بھی چھاپے مارے جا رہے ہیں۔
پولیس حکام کے مطابق 9 مئی کے واقعات کے لاہور میں دہشت گردی کے 14 مقدمات درج ہوئے جب کہ 49 مقدمات دیگر سنگین دفعات کے تحت درج ہوئے، 1035 ملزمان دہشت گردی کے مقدمات میں گرفتار کیے گئے، اور 884 ملزمان دیگر مقدمات میں گرفتار کیے گئے تھے۔
پولیس حکام کے مطابق دہشت گردی دفعات کے تحت مقدمات میں 741 ملزمان جوڈیشل ہوئے، اور دیگر دفعات کے تحت مقدمات میں 318 ملزمان کو جوڈیشل رکھا گیا، جب کہ دیگر تمام ملزمان ضمانتوں پر ہیں یا مقدمات سے ڈسچارج کیے جا چکے ہیں۔
