ویسے تو تمام سبزیاں قدرت کا ایک انمول تحفہ ہیں اور ان کے ہر گروپ میں مختلف اجزاء اور غذائیت پائی جاتی ہے جن کا متوازن استعمال جسمانی نشوونما کے لیے ضروری ہے، ان سبزیوں میں سے ایک ’’کدو‘‘ بھی ہے۔
امریکا اور یورپ میں کدو کے متعدد پکوان تیار کیے جاتے ہیں جنہیں لوگ بہت شوق سے کھاتے ہیں جبکہ پاکستان میں کدو کو زیادہ تر سالن، حلوہ، مٹھائی، اچار اور دیگر کچھ پکوان بنانے کے لیے استعمال کیا جاتا ہے۔
عام زندگی میں ہم کدو کو صرف خوراک کے طور پر استعمال کرتے ہیں لیکن اس کے اور بہت سے فائدے ہیں، ہم یہاں اس سبزی کے چند نسخے اور افادیت پیش کررہے ہیں جن میں کدو کو دوا کے طور پر بھی شامل کیا گیا ہے۔
دانت درد میں افاقہ
دانت میں درد ہونے کی صورت میں کدو کا گودا پانچ تولے اور لہسن ایک تولہ لے کر دونوں کو ایک سیر پانی ڈال کر خوب اچھی طرح سے پکائیں جب گودا آدھا جل جائے تو اسی نیم گرم پانی سے کلیاں کریں۔ انشاء اللہ درد میں افاقہ ہوگا۔
آنکھوں کے لیے مفید
قدرت نے کدو میں وٹامن اے کوٹ کوٹ کر بھرا ہے، ماہرین کے مطابق وٹامن اے آنکھوں کے لیے بے حد مفید ہے، یہ صرف نظر کو بہتر نہیں بناتا بلکہ آنکھوں کو موتیا سے بھی بچاتا ہے۔
کدو میں لیوٹین اور زیکسانتھن پیگمنٹس بھی پائے جاتے ہیں جو آنکھوں کو خطرناک شعاؤں سے بچاتے ہیں جبکہ اس میں موجود زنک آنکھوں کے پردے یعنی ریٹنا کو تحفظ فراہم کرتا ہے۔
یرقان سے بچاؤ میں مددگار
ایک عدو کدو لے کر اسے ہلکی آگ میں جلا کر بھرتا بنا لیں اور اس کا پانی نچوڑ کر اس میں تھوڑی سی مصری ملا کر پی لیں۔ یرقان کے لیے بہت مفید ہے۔
گھر میں کسی کو بچھو ڈنگ مار دے اور فوری طور پر ڈاکٹر تک پہنچنے میں دشواری ہو تو آپ کدو کے گودے سے مریض کو فوری طبی امداد دے سکتے ہیں۔ ڈنگ والی جگہ پر کدو کے گودے کا اچھی طرح لیپ لگا دیں اور ساتھ ہی اسے اس کا پانی بھی پلائیں، زہر کا اثر زائل ہو جائے گا۔
قوت مدافعت میں اضافہ
کدو میں وٹامن اے کے علاوہ وٹامن سی بھی پایا جاتا ہے جو انسان کی قوت مدافعت میں اضافہ کرتا ہے۔ وٹامن سی نیوٹروفلز کے ساتھ مل کر خطرناک بیکٹریا کا خاتمہ کرتا ہے جس سے قوت مدافعت میں اضافہ ہوتا ہے۔
موسم سرما کی آمد کے ساتھ فلو، نزلہ اور زکام کی شکایت بھی عام ہو جاتی ہے۔ کدو میں وٹامن ڈی اور وٹامن ای بھی پایا جاتا ہے اور سرد موسم میں یہ آپ کو فلو، نزلہ اور زکام سے بچاتا ہے۔ اس کا بنا ہوا سوپ پینے سے آپ جلد خود کو بہتر محسوس کرتے ہیں۔
جسمانی طور پر مضبوطی
ماہرین جسمانی مضبوطی کے لیے پوٹاشیم کو اہم قرار دیتے ہیں۔ پوٹاشیم صرف کیلے میں ہی نہیں بلکہ کدو میں بھی پایا جاتا ہے۔ پکے ہوئے کدو کی آدھی پیالی میں تقریباً 250 ملی گرام پوٹاشیم پایا جاتا ہے۔ پوٹاشیم پٹھوں کو مضبوط بناتا ہے، جسمانی رطوبتوں کو ریگولیٹ کرتا ہے، جسم کے خلیوں کے درمیان توازن برقرار رکھتا ہے اور سب سے بڑھ کر بلڈ پریشر کو نارمل رکھتا ہے۔
وزن کم کرنے میں مددگار
کدو کا 90 فیصد حصہ پانی پر مشتمل ہے۔ اگر آپ صحت بخش غذاؤں کے استعمال کے ذریعے وزن کم کرنا چاہتے ہیں تو کدو کو اپنی غذا کا حصہ لازمی بنائیں کیونکہ اس کا بیشتر حصہ پانی پر مشتمل ہے، یہ کیلوریز میں کم اور مفید غذائی اجزا سے بھرپور اور قدرتی مٹھاس والی غذا ہے۔
کدو فائبر سے بھرپور ہوتا ہے جو انسان کے نظام انہضام کو بہتر بناتا ہے، اسے کھا کر آپ بہت دیر تک خود کو توانا محسوس کرتے ہیں اور کچھ کھانے کی ضرورت محسوس نہیں کرتے اور اس طرح آپ اپنا وزن کم کرسکتے ہیں۔ اس کے بیج نہایت مزیداراور قوت بخش ہوتے ہیں جبکہ یہ اینٹی آکسیڈینٹس کی خوبیاں رکھتے ہیں، ان میں میگنیشیم، زنک، مینگانیز بھی پایا جاتا ہے۔ کدو کے ایک کپ میں 7 گرام فائبر پایا جاتا ہے۔
جلد کو جواں رکھے
کدو میں اینٹی آکسیڈینٹس پائے جاتے ہیں جو جلد کو خراب کرنے والے ایٹمز سے محفوظ رکھتے ہیں، کدو میں بیٹا کیروٹین جیسے اینٹی آکسیڈینٹس پائے جاتے ہیں جو ان ایٹمز کو نیوٹرالائز کر دیتے ہیں جس سے جلد پر جھریاں یا بڑھاپے کا اثر سست ہوجاتا ہے اور آپ پرکشش اور جوان نظر آتے ہیں۔