پارٹی ٹکٹ نہ ملنے پر دانیال عزیز نے آزاد حیثیت میں الیکشن لڑنے کا اعلان کردیا۔ این اے 75 سے چوہدری انوارالحق کو ٹکٹ ملا ہے۔
تفصیلات کے مطابق مسلم لیگ ن نے این اے 75 سے چوہدری انوارالحق کو ٹکٹ جاری کیا ہے جبکہ دانیال عزیز کو نظرانداز کردیا گیا ہے۔ دانیال عزیز کا کہنا ہے کہ مجھے ٹکٹ نہیں ملا آزاد حیثیت میں الیکشن لڑوں گا۔
اے آر وائی نیوز کے پروگرام الیونتھ آور میں گفتگو کرتے ہوئے دانیال عزیز نے کہا کہ عوام کے قریب سب سے اہم مسئلہ مہنگائی ہے۔ مہنگائی سے متعلق جو گفتگو کی تھی درست تھی۔ مہنگائی کے خلاف میری لڑائی جاری رہےگی۔
رہنما ن لیگ نے کہا کہ الیکشن ضرورلڑوں گا، مہنگائی کا خاتمہ میرا مشن ہے۔ مہنگائی کیخلاف میری لڑائی جاری رہےگی۔
انھوں نے کہا کہ این اے 75 سے آزاد حیثیت میں الیکشن لڑوں گا۔ این اے 75 سے ن لیگ نے انوارالحق کو ٹکٹ جاری کیا ہے۔
دانیال عزیز نے کہا کہ مہنگائی سے متعلق گفتگو کرنے پر ن لیگ نے ٹکٹ سے محروم کیا۔ احسن اقبال کا نام لینے پر شوکاز جاری کیا گیا تھا جس کا تفصیل سے جواب دیا۔
انھوں نے کہا کہ پنجاب اسمبلی کی نشست کیلئے میری اہلیہ کو بھی ٹکٹ نہیں دیا گیا۔ پنجاب اسمبلی کیلئے میری اہلیہ آزاد حیثیت سے الیکشن میں حصہ لیں گی۔
واضح رہے کہ دانیال عزیز نے احسن اقبال پر تنقید کی تھی اور انھیں مہنگائی کا ذمہ دار ٹھہرایا تھا۔ رہنما مسلم لیگ ن نے 16 ماہ کی حکومتی کارکردگی کا پوسٹ مارٹم کیا تھا۔ دانیال نے معاشی تباہی اور مہنگائی کا ذمہ دار پی ڈی ایم حکومت کو ٹھہرایا تھا۔
