ملک میں ٹیکس چوروں کے بجلی اور گیس کے کنکشنز منقطع اور موبائل سمز کو بلاک کرنے کا فیصلہ موخر کر دیا گیا ہے۔
اے آر وائی نیوز کو فیڈرل بورڈ آف ریونیو (ایف بی آر) ذرائع سے ملنے والی اطلاعات کے مطابق ملک میں ٹیکس چوروں کے بجلی اور گیس کے کنکشز منقطع اور موبائل فون سمز کو بلاک کرنے کا فیصلہ موخر کر دیا ہے جس کی وجہ نان فائلز کے خلاف ایکشن لینے سے قبل انکم ٹیکس جنرل آرڈر تیار نہ ہونا بتائی گئی ہے۔
ذرائع کا کہنا ہے کہ ایف بی آر لیگل ایشوز کے مسائل اور ڈیٹا مکمل نہ ہونے کے باعث نان فائلرز کیخلاف ایکشن نہیں لے سکا کیونکہ جنرل آرڈر تیار کیے بغیر نان فائلرز کے خلاف اقدامات سے ایف بی آر کو عدالتوں سے قانونی مسائل کا سامنا کرنا پڑ سکتا ہے۔
ذرائع نے بتایا ہے کہ یکم مارچ تک ایکٹو ٹیکس دہندہ لسٹ جاری کرنے کے بعد نان فائلرز کیخلاف اقدامات شروع ہو سکتے ہیں۔ جس میں نان فائلرز کی سمز بند، کنکشن منقطع کرنے کےعلاوہ جرمانے عائد کرنے کے اقدامات شامل ہوں گے۔
واضح رہے کہ ایف بی آر نے نان فائلرز کے خلاف انکم ٹیکس آرڈیننس 2001 کی 114 بی کے تحت کارروائی کرنا تھا اور ان اقدامات کے ذریعے جون 2024 تک 20 لاکھ تک نئے ٹیکس دہندگان کو ٹیکس نیٹ میں لانے کا ہدف تھا۔
