سعودی حج و عمرہ و زیارت کی قومی کمپنی کے رکن سعید باحشوان کا اپنے ایک بیان میں کہنا تھا کہ ’تین ماہ (رجب، شعبان اور رمضان) میں عمرہ زائرین بڑی تعداد میں مکہ مکرمہ پہنچیں گے، انہوں نے کہا کہ یہ تینوں مہینے عمرہ سیزن کے حوالے سے بہت مصروف ہوتے ہیں۔
بین الاقوامی خبر رساں ادارے کی رپورٹ کے مطابق سعید باحشوان کا کہنا تھا کہ ’270 عمرہ کمپنیاں اور ادارے زائرین کی آمد سے ان کی وطن واپسی تک سروسز فراہم کر رہی ہیں۔‘
سعید باحشوان کا کہنا تھا کہ اعلیٰ قیادت کی جانب سے ہدایت کی گئی ہے کہ زائرین کو مقدس شہروں میں ہر ممکن بہتر سہولت فراہم کی جائے، اس کی نگرانی وزارت حج و عمرہ کر رہی ہے۔
انہوں نے کہا کہ دونوں شہروں کے ہوٹل زائرین کی غیرمعمولی تعداد کی آمد پر زیادہ مصروف ہوں گے۔ عمرہ کمپنیاں اور ادارے مکہ مکرمہ اور مدینہ منورہ میں زائرین کی منفرد میزبانی کے لیے پوری طرح چوکس ہیں۔
عمرہ زائرین اپنے پیاروں کے لیے اس سال بھی بڑی تعداد میں تحائف خریدیں گے، علاوہ ازیں پبلک ٹرانسپورٹ، ریستورانوں، شاپنگ سینٹرز اور بازاروں میں گہما گہمی رہے گی۔
سعودی عرب: شاہی فرمان کے ذریعے خوشخبری سنا دی گئی
انہوں نے کہا کہ پاکستان، انڈیا، انڈونیشیا، ترکیہ، لیبیا، ازبکستان، مصر، تیونس، الجزائر، ملائیشیا اور دیگر ملکوں سے زائرین عمرہ ادا کرنے اور اپنی زندگی کے انمول روحانی لمحات حرمین شریفین میں گزارنے کے لیے مکہ مکرمہ اور مدینہ منورہ پہنچ رہے ہیں۔
