حکومت نے عالمی مالیاتی ادارے آئی ایم ایف کے مطالبے پر نیب سمیت اینٹی کرپشن اداروں میں سیاسی مداخلت ختم کرنے کا یقین دلا دیا ہے۔
اے آر وائی نیوز کے مطابق عالمی مالیاتی ادارے آئی ایم ایف نے پاکستان میں کرپشن اور منی لانڈرنگ روکنے کے لیے اداروں کو مضبوط بنانے پر زور دیا ہے، اس کے جواب میں حکومت نے نیب سمیت اینٹی کرپشن اداروں میں سیاسی مداخلت ختم کرنے کا یقین دلا دیا ہے۔
اس حوالے سے دستاویز کے مطابق حکومت نے آئی ایم ایف کو یقین دہانی کرائی ہے کہ کابینہ کی منظوری سے اینٹی کرپشن فریم ورک میں بہتری کیلیے رپورٹ شائع ہو گی اور اینٹی کرپشن ٹاسک فورس مارچ میں اپنی رپورٹ شائع کرے گی۔
اس حوالے سے ایک ٹاسک فورس بھی تشکیل دی جائے گی جس میں بین الاقوامی تجربے کے حامل ماہرین، سول سوسائٹی شامل ہوں گے۔ کرپشن کی نشاندہی، اداروں کوشفاف اور موثر بنانے کیلیے اصلاحات کی جائیں گی۔ عوامی نمائندوں، کابینہ ارکان کے ظاہر کردہ اثاثوں کی معلومات تک عوام کو رسائی دی جائیگی
دستاویز میں کہا گیا ہے کہ رشوت، فراڈ اور بھتہ خوری کی روک تھام کیلیے اداروں کو مضبوط بنانا حکومت کی اولین ترجیح ہے۔ حکومت نے کرپشن کیسز کی تحقیقات اور سزاؤں کیلیے نیب سمیت اداروں کو شفاف و مؤثر بنانے کا عزم بھی کیا ہے جب کہ چیئرمین نیب کی میرٹ پر تعیناتی اور تحقیقات کیلیے نیب کے دائرہ اختیار کا تعین کرنے کی یقین دہانی بھی کرائی ہے۔
