جے یو آئی (ف) کے سربراہ مولانا فضل الرحمان نے کہا ہے کہ بانی پی ٹی آئی نوجوانوں کو تباہ کرنے کا ایجنڈا لائے تھے۔
تفصیلات کے مطابق مولانا فضل الرحمان کا کہنا تھا کہ بانی تحریک انصاف کیخلاف قانون حرکت میں آیا تو کہتا ہے میں مظلوم ہوں۔ اسرائیل کو تسلیم کرنے کیلئے بانی پی ٹی آئی کو پاکستان بھجوایا گیا۔ ہم نے کہا تھا کہ بانی پی ٹی آئی یہودی لابی کا ایجنٹ ہے۔
انھوں نے کہا کہ پی ٹی آئی کو اسرائیل سمیت دیگر ممالک سے پیسے ملے۔ پی ٹی آئی کی منافقت ہم جانتےہیں، موساد اور را کی فنڈنگ سے پارٹی بنانے والے ریاست مدینہ کی بات کرتے ہیں۔ اسرائیل کو تسلیم کرنے کا ایجنڈا ہم نے ناکام بنایا۔
سربراہ جے یو آئی (ف) نے کہا کہ بانی پی ٹی آئی کی حکومت 75 سال کی سب سے بدترین حکومت تھی۔ بانی پی ٹی آئی ریاست مدینہ کے نام پر قوم کو دھوکا دے رہے تھے۔
فضل الرحمان نے کہا کہ بانی پی ٹی آئی نے سی پیک جیسے پراجیکٹ روکے۔ اقتدار میں آکر سی پیک ودیگر پراجیکٹ دوبارہ شروع کرینگے۔
انھوں نے کہا کہ 75 سال گزرنے کے باوجود ملک میں مفلسی اور بےروزگاری کا راج ہے۔ ڈی آئی خان کو انڈسٹریل زون اور ریجنل کارگو ایئرپورٹ بنائیں گے۔
فضل الرحمان نے کہا کہ ڈیرہ میں گومل میڈیکل کالج کو میڈیکل یونیورسٹی بنائیں گے۔ ڈیرہ سے پشاور تک موٹروے بھی بنائیں گے۔
