اسلام آباد: چیف الیکشن کمشنرسکندر سلطان راجہ کا کہنا ہے کہ سیکیورٹی سمیت الیکشن کمیشن کے تمام انتظامات مکمل ہیں، الیکشن مکمل طور پر شفاف ہوں گے، ووٹرز آزادی سے ووٹ ڈالیں۔
اے آر وائی نیوز کے مطابق چیف الیکشن کمشنر سکندر سلطان راجہ کا کہنا تھا کہ قومی فریضے میں سب کو حصہ ڈالنا چاہیے، الیکشن مینجمنٹ سسٹم کا انٹرنیٹ پر دارومدار نہیں۔
انہوں نے کہا کہ گزشتہ روز بلوچستان میں دہشت گردی کے واقعات ہوئے، سیکیورٹی صورتحال کاجائزہ لینا وزارت داخلہ اور ایجنسیوں کا کام ہے، امید ہے انتخابات کا عمل بخیرو عافیت مکمل ہوگا۔
سکندرسلطان راجہ نے کہا کہ الیکشن کمیشن وزارت داخلہ کو انٹرنیٹ سروسز کے حوالے سے کوئی ہدایات نہیں دیگا، ہم کہیں موبائل سروس کھولیں اور دہشتگردی کاواقعہ ہوجائے تو کون ذمہ دار ہوگا۔
دوسری جانب الیکشن کمشنر سندھ نے پریزائیڈنگ افسر سے الیکشن مٹیریل چھیننے کانوٹس لے لیا، متعلقہ ریٹرننگ افسر اور ڈسٹرکٹ مانیٹرنگ افسر سے رپورٹ طلب کرلی گئی۔
اے آر وائی نیوز کے مطابق پولیس اوررینجرزکی اضافی نفری کوپولنگ اسٹیشن کے باہر تعینات کر دیا گیا ہے، الیکشن کمشنر سندھ کی جانب سے پولیس کوملوث عناصر کیخلاف سخت کارروائی کی ہدایت کی گئی ہے۔ الیکشن کمشنر سندھ کا اس حوالے سے کہنا ہے کہ انتخابات کی شفافیت پرسمجھوتہ نہیں کیاجائیگا۔
یاد رہے کہ رات گئے کراچی کے علاقے ملیر سعود آباد میں نامعلوم مسلح افراد نے پریزائیڈنگ افسر کو لوٹ لیا تھا۔
پولیس کے مطابق کراچی کے علاقے ملیر سعود آباد میں مسلح افراد پریزائیڈنگ افسر سے ووٹنگ بکس بھی لوٹ کر لے گئے۔ افسر عملے کے ساتھ اسکول میں داخل ہوا تو مسلح افراد آگئے۔
الیکشن کمشنر سندھ کا پریزائیڈنگ افسر سے الیکشن مٹیریل چھیننے کا نوٹس
پولیس کا کہنا ہے کہ واردات کے دوران 2 سے 3 بکس، قیمتی سامان لوٹا گیا، واقعہ پاکستان پبلک اسکول میں پیش آیا تھا۔
