الیکشن کے پیش نظر 8 فروری کو موبائل فون سروس بند کردی گئی تھی، تاہم انتخابی دن گزرنے کے باوجود سیلولر سروس بحال نہ ہوسکی۔
تفصیلات کے مطابق وزارت داخلہ کے اعلان کے باوجود ملک بھر میں موبائل سروس مکمل طور پر بحال نہیں ہوسکی ہے۔ وزارت داخلہ نے 8 بجے اعلان کیا تھا کہ موبائل سروس بحال کی جارہی ہے۔
ملک میں ہونے والے دہشت گردی کے واقعات کے تناظر میں وزارت داخلہ کی جانب سے ملک بھر میں انٹرنیٹ، موبائل فون سروس عارضی طور پر معطل کرنے کا فیصلہ کیا گیا تھا۔
اے آر وائی نیوز کے مطابق وزارت داخلہ کا کہنا تھا کہ ملک میں دہشت گردی کے حالیہ واقعات کے نتیجے میں قیمتی جانوں کا ضیاع ہوا، امن وامان قائم رکھنے، ممکنہ خطرات سے نمٹنے کیلئے حفاظتی اقدامات ناگزیر ہیں۔
دوسری جانب اسلام آباد میں حساس مقامات کی سیکیورٹی سخت کردی گئی تھی، جبکہ ریڈزون کو سیل کردیا گیا، الیکشن کمیشن مرکزی سیکرٹریٹ کی سیکیورٹی بھی سخت کی گئی تھی۔
پولیس اور ایف سی کی بھاری نفری تعینات کی گئی تھی ، الیکشن کمیشن کی حدود میں غیر متعلقہ افرادکے داخلے پر پابندی عائد تھی۔ الیکشن کمیشن میں داخلے کیلئے متعلقہ افراد کیلئے خصوصی پاسز جاری کئے گئے تھے۔
واضح رہے کہ پاکستان کی تاریخ کے سب سے بڑے اور بارہویں عام انتخابات کیلئے پولنگ 8 فروری 2024 کو منعقد ہوئی جس کے نتائج آنے کا سلسلہ جاری ہے۔
