لاہور : پنجاب میں نمونیا نے مزید 6 بچوں کی جان لے لی، جس کے بعد نمونیا سے انتقال کرنے والے بچوں کی تعداد 353 ہوگئی ہے۔

تفصیلات کے مطابق پنجاب میں سردی اور نمونیہ سے بچوں کی اموات کا سلسلہ نہ رک سکا، محکمہ صحت پنجاب کی جانب سے کہا گیا کہ 24 گھنٹے میں پنجاب میں نمونیہ سے مزید 6 بچے انتقال کرگئے۔

محکمہ صحت پنجاب کے مطابق پنجاب میں 24 گھنٹے کے دوران نمونیہ کے 854 نئے کیسز رپورٹ ہوئے جبکہ لاہور میں ایک روز کے دوران نمونیہ کے 188 نئے کیسز سامنے آئے۔

محکمہ صحت کا بتانا ہے کہ پنجاب میں رواں سال نمونیاسے 353  اموات اور 25 ہزار 938 کیسز رپورٹ ہوچکے جبکہ صرف لاہور میں رواں سال نمونیہ سے 61 اموات اور 5 ہزار 522 کیسز رپورٹ ہوئے۔