داعش کے سربراہ البغدادی کی اہلیہ اور بیٹی نے کئی رازوں سے پردہ ہٹا دیا ہے، بیٹی امیمہ کا کہنا تھا کہ انھیں والد کی خلافت کے اعلان پر صدمہ ہوا تھا۔
تفصیلات کے مطابق داعش کے مقتول سربراہ ابوبکر البغدادی کی بیٹی امیمہ اور اہلیہ اسما نے العربیہ اور الحدث کو انٹرویو دیا ہے، جو اس وقت عراق کی ایک جیل میں قید ہیں، انھوں نے کہا ’’میں نے والد کو ٹی وی پر موصل کی النوری مسجد سے داعش کی خلافت کا اعلان کرتے ہوئے دیکھا تو مجھے بہت صدمہ ہوا تھا۔‘‘
امیمہ نے انکشاف کیا کہ البغدادی کی خلافت کے اعلان کے بعد پورے خاندان کی زندگی بے تحاشا پابندیوں کی زد میں آ گئی تھی، طیاروں کے خوف سے انھیں باغ سے باہر جانے کی اجازت بھی نہیں تھی، پڑوسیوں کے ہاں بھی نہیں جا سکتے تھے۔
البغدادی کی اہلیہ کا یہ انٹرویو ان کی ہلاکت کے پانچ سال بعد سامنے آیا ہے، اسما نے یہ سنسنی خیز انکشاف کیا کہ البغدادی کے پاس 10 سے زیادہ خواتین تھیں جن کو اس نے قیدی بنا رکھا تھا، تاہم اسما نے کہا کہ البغدادی ان کے ساتھ حسن سلوک کرتا تھا۔
البغدادی کی بیوی کے مطابق اس نے ایک 13 سالہ عراقی لڑکی سے بھی شادی کر رکھی تھی، وہ خواتین کے جنون میں مبتلا تھا، اوراس نے خلافت کے لیے بنائی ریاست کو زنان خانے میں تبدیل کر دیا تھا۔
اسما نے کہا ان کے شوہر ذیابیطس کے مریض تھے اور خلافت کے اعلان کے بعد وہ اپنی خواہشات میں مبتلا ہو گیا تھا، وہ اپنی ایسی ریاست کے حصول کا خواہش مند تھا جو یورپ میں روم تک پہنچ جائے۔ اہلیہ کا کہنا تھا کہ ان کی اپنے شوہر سے ملاقات شاذ و نادر ہی ہوتی تھی کیوں کہ وہ ہر وقت حرکت میں رہتا تھا۔
