سیاحت کے شوقین افراد نے سرد موسم سے لطف اندوز ہونے کے لیے گلیات کا رخ کر لیا ہے۔
پاکستان کی خوب صورت ترین پہاڑی گلیوں ’گلیات‘ میں سنو فیسٹول نے بھی بہار دکھائی، ڈی جی گلیات ڈویلپمنٹ اتھارٹی شاہ رخ علی نے دو روزہ سنو فیسٹول کا باقاعدہ افتتاح کیا، جس میں ملک بھر سے بڑی تعداد میں سیاح شریک ہوئے۔
ترجمان جی ڈی اے کے مطابق سنو فیسٹول میں ملک بھر سے سیاحوں کی آمد کا سلسلہ جاری رہا، فیسٹول میں زپ لائن، سنو ٹیوب، آرچری، سنو ہائکنگ، اور ٹگ آف وار کے مقابلے ہوئے۔
فیسٹول میں کراچی، لاہور، پشاور سمیت دیگر شہریوں نے بڑی تعداد میں شرکت کی، سیاح برف پر مختلف کھیلوں کے مقابلوں میں بھی حصہ لے کر خوب محظوظ ہوتے رہے۔
ڈائریکٹر جنرل جی ڈی اے شاہ رخ علی خان نے اے آر وائی نیوز کو بتایا کہ سنو فیسٹول میں سیاحوں کی دل چسپی کے لیے مختلف کھیلوں کے مقابلے رکھے گئے، سیاح یہاں آ کر خوب صورت نظاروں کے ساتھ روایتی طور پر کھیل کے مقابلوں میں بھی حصہ لیتے رہے، فیسٹول میں رات کو میوزک کا بھی اہتمام کیا گیا، جس میں گلوکار اپنے آواز کا جادو جگاتے رہے۔
