اسلام آباد: احاطہ عدالت سے گرفتاری کے معاملے پر ہائیکورٹ کے حکم پر اسلام آباد پولیس نے ایس او پیز مرتب کر لیے۔
تفصیلات کے مطابق اسلام آباد ہائی کورٹ کے حکم کے بعد آئی جی اسلام آباد نے احاطہ عدالت سے ملزمان کی گرفتاری کے سلسلے میں نئے ایس او پیز ہائیکورٹ میں پیش کر دیے۔
آئی جی کی جانب سے اسلام آباد پولیس کو ہدایات جاری کی گئی ہیں کہ انصاف کے حصول کے لیے آئے ملزم کی احاطہ عدالت سے گرفتاری نہ کی جائے، یہ ایس او پیز اسلام آباد ہائیکورٹ کے جسٹس ارباب محمد طاہر کے حکم پر مرتب کی گئی ہیں۔
نئے ایس او پیز اسلام آباد کے تفتیشی افسران کو بھیجوا دیے گئے ہیں، جن میں کہا گیا ہے کہ انصاف کے حصول کے آئے ملزم کی احاطہ عدالت سے گرفتاری نہیں ہوگی، صرف عدالتی حکم پر گرفتاری عمل میں لائی جا سکے گی۔
ایس او پیز کے مطابق دہشت گردی، عدالتی وقار، اور عوام کے جان و مال کے تحفظ کے لیے گرفتاری کی جا سکے گی، ملزم اگر احاطہ عدالت میں قابل دست اندازی جرم کا ارتکاب کرے تو اس کی گرفتاری عمل میں لائی جائے گی، اور ایسی کسی گرفتاری کی صورت میں عدالتی سیکیورٹی انچارج کو مطلع کیا جائے گا۔
ایس او پیز کے مطابق ایس پی سیکیورٹی ان تمام معاملات میں انچارج ہوں گے، اور آئندہ سے کسی قسم کی خلاف ورزی پر اہلکاروں کے خلاف تادیبی کارروائی کی جائے گی۔
