اسلام آباد: پاکستان تحریک انصاف (پی ٹی آئی) کے 3 مارچ کو ہونے والے انٹرا پارٹی انتخابات کیلیے کاغذات نامزدگی جمع کروانے کا وقت ختم ہوگیا۔
انٹرا پارٹی الیکشن کیلیے بیرسٹر گوہر نے چیئرمین کیلیے کاغذات نامزدگی جمع کروائے جبکہ سیکرٹری جنرل امیدوار عمر ایوب کی قیادت میں پندرہ رکنی پینل نے کاغذات نامزدگی جمع کروا دیے۔
سندھ سے اشرف قریشی، بلوچستان سے محمد اسلم اور خیبر پختونخوا سے نوید انجم نے چیئرمین کے عہدے کیلیے کاغذات جمع کروائے۔ پنجاب سے یاسمین راشد نے صوبائی تنظیم کیلیے کاغذات جمع کروا دیے۔
سندھ کیلیے حلیم عادل شیخ اور خاوند بخش غلام محمد کی قیادت میں دو پینلز کے کاغذات موصول ہوئے۔ کاغذات نامزدگی کی وصولی کیلیے مرکز اور صوبوں میں الگ الگ ریٹرنگ افسران مقرر کیے گئے۔
پی ٹی آئی کے انٹرا پارٹی الیکشن شیڈول کے مطابق 3 مارچ کو ہوں گے۔ کاغذات جمع کروانے کا وقت 25 فروری سہ پہر 3 بجے تک تھا۔
