ایچ بی ایل پاکستان سپر لیگ کی فرنچائز کراچی کنگز کے کپتان شان مسعود نے کہا ہے کہ جب میری پرفارمنس آئے گی تو ٹیم کو اور فائدہ ہوگا۔
کراچی کنگزکے کپتان شان مسعود نے پریس کانفرنس میں کہا کہ کراچی میں کھیلنے کے لیے کافی پرجوش ہیں، اچھی ٹیم وہ ہوتی ہے جو اپنی غلطیوں سے سیکھتی ہے اور ہماری ٹیم نے بہت کچھ سیکھا ہے اور سب نے پرفارم کیا ہے۔
کنگز کے کپتان کا کہنا تھا کہ مجھے اچھا آغاز مل رہا ہے لیکن میں اس کو آگے نہیں بڑھا پارہا، جب میری پرفارمنس آئے گی تو ٹیم کو اور بھی فائدہ ہوگا۔
شان مسعود نے کہا کہ نواز کی جتنی صلاحیت ہے اس نے ویسا پرفارم نہیں کیا،عرفات منہاس اچھا کھلاڑی ہے جہاں ان کی ضرورت ہوگی ہم کھلائیں گے۔
شان مسعود نے مزید کہا کہ ٹکٹ کا اپنی فیملی کو بھی منع کردیا ہے، پی ایس ایل میں سب کھلاڑی ٹکٹ کی وجہ سے پریشان ہوتے ہیں۔
واضح رہے کہ کراچی کنگز پی ایس ایل سیزن 9 کی پوائنٹس ٹیبل میں تین میچوں میں دو فتوحات کے ساتھ چوتھی پوزیشن پر موجود ہیں جبکہ کل بدھ کو کراچی کی نیشنل اسٹیڈیم میں کراچی کنگز اور اسلام آباد یونائیٹڈ کی ٹیمیں مدمقابل آئیں گی۔
