بھارت کی ریاست مغربی بنگال میں طلبہ کے ایک گروپ نے امتحان کے دوران سختی کرنے پر تین اساتذہ کی سڑک پر پٹائی کر دی۔
میڈیا رپورٹس کے مطابق ضلع ندیا میں ہائیر سیکنڈری اسکول کے اساتذہ نے پولیس میں شکایت درج کروائی کہ انہیں امتحان میں سختی کرنے پر کچھ طلبہ نے تشدد کا نشانہ بنایا۔
اساتذہ نے پولیس کو اپنی شکایت میں بتایا کہ حملہ اُس وقت کیا گیا جب ہم گھر لوٹ رہے تھے۔
طالب علموں کی جانب سے تشدد پر اردگرد موجود لوگوں نے مداخلت کر کے اساتذہ کی جان بچائی جبکہ ملزمان موقع سے فرار ہوگئے۔
اسکول کے ہیڈ ماسٹر شانتنو بسواس نے اپنے بیان میں بتایا کہ تشدد میں ملوث طالب علم کچھ دنوں سے اساتذہ کے ساتھ بدسلوکی کر رہے تھے۔
شانتنو بسواس نے بتایا کہ اساتذہ نے امتحان کے دوران طالب علموں کو ایک دوسرے سے گفتگو کرنے سے منع کیا تھا جبکہ بار بار بیت الخلا جانے کی اجازت بھی نہیں دی تھی۔
انہوں نے بتایا کہ اساتذہ نے پہلے ہی کہہ دیا تھا کہ طالب علم امتحان کے بعد کوئی حرکت ضرور کریں گے، اور ایسا ہی ہوا۔
