شمالی وزیرستان میں پاک فوج کے ہاتھوں جہنم واصل 6 دہشت گردوں کی شناخت ہوگئی ، ہلاک دہشت گردوں کا تعلق افغانستان سے نکلا۔
تفصیلات کے مطابق پاکستان میں افغان نژاد کالعدم ٹی ٹی پی کے دہشت گردوں کے ملوث ہونے کی تصدیق ہوگئی ، 28فروری کو شمالی وزیرستان میں ہلاک 6دہشت گردوں کا تعلق افغانستان سے نکلا۔
کالعدم ٹی ٹی پی جیسے دہشت گرد نیٹ ورک کو افغان دہشت گردوں کی پشت پناہی حاصل ہیں اور کالعدم ٹی ٹی پی کا افغان شہریوں پر انحصار بڑھتا جا رہا ہے۔
سپن وام میں پاک فوج کے ہاتھوں جہنم واصل 6دہشتگردوں کی شناخت ہوگئی جبکہ مقامی ذرائع نے آپریشن کے دوران ایک خودکش حملہ آورکی ہلاکت کی بھی تصدیق کی، مصدقہ اطلاعات کے مطابق ہلاک دہشتگردوں کا تعلق افغانستان سے ہے۔
ہلاک دہشتگردوں میں محمد انور ولد انگور خان سکنہ خوست،حمزہ سکنہ لوگر، فرمان سکنہ لوگر، شبیر عرف عابد سکنہ ، گل جان سکنہ پکتیکا اور طلحہ عرف ضرار شامل ہیں جبکہ شمالی وزیرستان کا رہائشی 16سالہ مبینہ خودکش بمبار عابد اللہ بھی ہلاک دہشتگردوں میں شامل ہیں۔
افغانوں کا دہشت گرد کارروائیوں میں استعمال افغان عبوری حکومت کے دعوؤں کی نفی ہے ، افغان حکومت کوشہریوں کو دہشت گردی سے بچانے کیلئے ٹھوس اقدامات کی ضرورت ہے جبکہ عالمی برادری پاکستان میں افغان دہشتگردوں کی سرگرمیاں روکنے میں اپنا کردار ادا کرے۔
