ملک کے نئے صدر کا انتخاب 9 مارچ کو ہوگا جس کے لیے امیدواروں کی حتمی فہرست الیکشن کمیشن آج جاری کرے گا۔
اے آر وائی نیوز کے مطابق نئے صدر مملکت کا انتخاب ہفتہ 9 مارچ کو ہوگا جس کے لیے امیدواروں کی حتمی فہرست الیکشن کمیشن آج جاری کرے گا۔ امیدوار کل تک اپنے کاغذات نامزدگی واپس لے سکیں گے۔
صدارتی انتخاب کے لیے 7 امیدواروں کی جانب سے کاغذات نامزدگی جمع کرائے گئے تھے جن میں پی پی کی جانب سے سابق صدر آصف علی زرداری، سنی اتحاد کونسل کی جانب سے محمود خان اچکزئی نے کاغذات نامزدگی جمع کرائے گئے تھے۔
ان کے علاوہ اصغر علی مبارک، عبدالقدوس اور وحید احمد کمال سمیت 5 امیدواروں نے آزاد حیثیت میں کاغذات نامزدگی جمع کرائے تھے تاہم الیکشن کمیشن نے صرف دو امیدواروں کے کاغذات نامزدگی منظور کیے ہیں۔
الیکشن کمیشن کی جانب سے منظور کیے گئے کاغذات نامزدگی کے مطابق آصف زرداری اور محمود خان اچکزئی میں عہدہ صدارت کے لیے مقابلہ ہوگا۔
واضح رہے کہ صدارتی انتخابات کے لیے ہفتہ 9 مارچ کو پولنگ صبح دس سے شام پانچ بجے تک پارلیمنٹ ہاؤس اور چاروں صوبائی اسمبلیوں میں ہوگی۔
