راولپنڈی: پاکستان کرکٹ بورڈ نے پی ایس ایل کے ضابطہ اخلاق کی خلاف ورزی کرنے پر بولر نسیم شاہ پر میچ فیس کا 10 فیصد جرمانہ کردیا۔
تفصیلات کے مطابق پاکستان کرکٹ بورڈ (پی سی بی) نے اتوار کو پنڈی کرکٹ اسٹیڈیم میں ملتان سلطانز کے خلاف میچ کے دوران پاکستان سپر لیگ (پی ایس ایل) کے ضابطہ اخلاق کی خلاف ورزی کرنے پر فاسٹ بولر نسیم شاہ پر میچ فیس کا 10 فیصد جرمانہ کردیا۔
کرکٹر نسیم شاہ نے گزشتہ روز اسلام آباد یونائیٹڈ اور ملتان سلطانز کے مابین کھیلے جانے والے میچ کی آخری بال کے بعد غصے میں اسٹمپ کو لات ماری تھی۔
پی سی بی کی جانب سے جاری کردہ ایک بیان میں کہا گیا کہ نسیم پر آرٹیکل 2.2 کی خلاف ورزی کا الزام عائد کیا گیا اس کے علاوہ نسیم شاہ نے بھی غلطی کا اعتراف کیا ہے۔
دریں اثنا، اسی میچ میں ملتان سلطانز کو سلو اوور ریٹ برقرار رکھنے پر جرمانہ بھی کیا گیا، ملتان سلطانز پر سلو اوور ریٹ کی وجہ سے 10 فیصد جرمانہ عائد کیا، ملتان سلطانز نے ایک اوور مقررہ وقت کے بعد کرایا تھا۔
