غزہ میں اسرائیلی فورسز نے ظلم کی انتہا کردی امداد کے منتظر سیکڑوں فلسطینیوں پر ہیلی کاپٹر سے گولیاں برسادیں۔
رپورٹ کے مطابق غزہ میں اسرائیلی فوج نے نیا قتل عام شروع کردیا، شمالی غزہ میں امداد کے منتظر سیکڑوں فلسطینیوں پر ہیلی کاپٹر سے گولیاں برسادیں جس کے نتیجے میں 20 افراد شہید اور 150 زخمی ہوگئے۔
فلسطینی وزارت صحت کا کہنا ہے اسرائیل نے قتل عام کا نیا سلسلہ شروع کردیا ہے روز امداد کے منتظرلوگوں کو سوچی سمجھی سازش کے تحت شہید کیا جارہا ہے، ایک ہفتے سے اسرائیلی فورسز مسلسل امداد کے انتظار میں کھڑے افراد پر حملہ کررہی ہے۔
دوسری جانب امریکا نے زور دیا ہے کہ اسرائیل کو انسانی ہمدردی کے کام کرنے والے کارکنوں کے تحفظ کو یقینی بنانے چاہیے۔
اس سے قبل 29 فروری کو فلسطینی محکمہ صحت کے حکام نے کہا بتایا تھا کہ اسرائیلی فورسز نے 100 سے زائد فلسطینیوں کو اس وقت گولی مار کر ہلاک کر دیا تھا جب وہ غزہ شہر کے قریب امدادی سامان کا انتظار کر رہے تھے۔
یاد رہے کہ 7 اکتوبر سے غزہ پر اسرائیلی حملوں میں کم از کم 31 ہزار 272 فلسطینی شہید اور 73 ہزار 24 زخمی ہو چکے ہیں۔ حماس کے 7 اکتوبر کے حملے میں اسرائیل میں مرنے والوں کی تعداد 1,139 ہے اور درجنوں کو قید کر رکھا ہے۔
اس کے علاوہ رمضان سے قبل امریکی، قطری اور مصری ثالثوں پر مشتمل وفد نے ماہ رمضان میں جنگ بندی اور قیدیوں کے تبادلے کے معاہدے کی کوشش کی تھی تاہم اس میں اب تک کوئی پیش رفت نہیں ہوسکی ہے۔
