کراچی : صدر مملکت آصف زرداری نے قومی اسمبلی کی نشست این اے 207 سے اپنی صاحبزادی آصفہ بھٹو زرداری کو نامزد کر دیا، وہ قومی اسمبلی کی نشست پر ضمنی انتخاب لڑیں گی۔
تفصیلات کے مطابق صدر آصف زرداری کی چھوڑی گئی قومی اسمبلی کی نشست پر آصفہ بھٹو الیکشن لڑیں گی، صدر آصف زرداری نے این اے دو سو سات سے آصفہ بھٹو زرداری کو نامزد کر دیا۔
آصف زرداری نے پارٹی رہنماؤں کو آصفہ بھٹو کی انتخابی مہم شروع کرنے کی ہدایت بھی کردی، پیپلز پارٹی کی جانب سے شیڈول کے مطابق آصفہ بھٹو کے فارم جمع کرائے جائیں گے۔
ضمنی انتخابات میں این اے207 شہیدبینظیرآباد سے پی پی امیدوارآصفہ بھٹونواب شاہ پہنچ گئیں ، صوبائی وزیر صحت ڈاکٹر عذرافضل پیچوہو بھی آصفہ بھٹو کے ہمراہ ہوں گی، پارٹی ترجمان کا کہنا ہے کہ آصفہ بھٹو ریلی کی صورت میں زرداری ہاؤس جائیں گیں۔
عام انتخابات میں این اے دو سو سات نواب شاہ سے آصف علی زرداری کامیاب ہوئے تھے، جس کے بعد آصف علی زرداری کےصدر مملکت بننےپراین اے 207 کی نشست خالی ہوئی ہے۔
دوسری جانب بلاول بھٹو کی این اے196 کی چھوڑی نشست پر ان کے چیف پولنگ ایجنٹ خورشیدجونیجو امیدوار ہوں گے، این اے196 قمبرشہدادکوٹ میں ضمنی الیکشن اپریل میں ہوں گے۔
