کراچی : گورنر سندھ کامران ٹیسوری نے کچے کے ڈاکوؤں اور ان کے بچوں کو آئی ٹی کورس کرانے کی پیشکش کر دی اور کہا آنے والی نسل کو ہنرمند بنا کر پندرہ سے بیس لاکھ روپے کمائیں۔
تفصیلات کے مطابق گورنر سندھ کامران ٹیسوری نے کچے کے ڈاکوؤں کو مفت مشورہ دیتے ہوئے کہا کہ اسلحہ پھینکیں، آئی ٹی سیکھیں اور آنے والی نسل کو ہنرمند بنا کر پندرہ سے بیس لاکھ روپے کمائیں۔
کامران ٹیسوری کا کہنا تھا کچے کے ڈاکوؤں کے سامنے آئی ٹی کا ڈاکو لا رہا ہوں، آئی ٹی والا کچے کے ڈاکو کھا جائے گا.
انھوں نے بتایا کہ حیدر آباد میں انفارمیشن ٹیکنالوجی یونیورسٹی بنا رہے ہیں، ڈاکو اسلحہ چھوڑیں اور اپنے بچوں کو بھی لے آئیں۔
گورنر سندھ کا مزید کہنا تھا کہ پہلے مرحلے میں 50 ہزار بچوں کو مصنوعی ذہانت (آرٹیفیشل انٹیلیجنس) اور آٹو میشن متعدد کورس مفت کرائے جائیں گے جس کے بعد نوجوان لاکھوں روپے کما سکیں گے۔
کامران ٹیسوری نے کہا کہ 50 کروڑ کی لاگت سے شروع اس منصوبے کیلئے فنڈز حکومت سے نہیں لئے بلکہ ڈونرز فراہم کریں گے۔
