اسلام آباد: صدر مملکت آصف زدراری، وزیر اعظم شہباز شریف اور دیگر نے ایسٹر کے موقع پر مسیحی برادری کو مبارک باد دیتے ہوئے خصوصی پیغام جاری کر دیا ہے۔
اسلام آباد: پاکستان سمیت دنیا بھر میں مسیحی برادری آج ایسٹر کا تہوار مذہبی جوش و جذبے سے منا رہی ہے، اس سلسلے میں گرجا گھروں میں عبادات کا اہتمام کیا گیا۔
اس موقعے پر صدر مملکت آصف علی زرداری نے کہا کہ ایسٹر کا تہوار امید، محبت اور خوشحالی کا پیغام لاتا ہے، مسیحی برادری پاکستان کا قیمتی اثاثہ ہے، انہوں نے ملکی ترقی و خوشحالی میں بڑھ چڑھ کر حصہ لیا۔
صدرمملکت نے کہا کہ پاکستان کی ترقی میں اقلیتوں کے کردار کو سراہتے ہیں، آئین تمام اقلیتوں کے حقوق کی ضمانت دیتا ہے، اقلیتوں کو مذہبی آزادی سمیت سیاسی، سماجی، معاشی حقوق حاصل ہیں۔
وزیراعظم شہباز شریف نے مسیحی برادری کو ایسٹر کی مبارکباد دیتے ہوئے کہا کہ ایسٹر پیار، رواداری اور عفوودر گزر کی اقدار اپنانے کا موقع فراہم کرتا ہے، ان اقدار کو اپنا کر تنازعات سے بھری دنیا کو امن کا گہوارہ بناسکتے ہیں۔
انہوں نے کہا کہ قیام پاکستان، ملکی ترقی میں مسیحی برادری کے اہم کردار پر خراج تحسین پیش کرتا ہوں، مسیحی برادری ملکی ترقی اور استحکام میں اپنا فعال کردار ادا کرتی رہے گی، ہمیں فخر ہے پاکستان مختلف عقائد اور ثقافتوں کا خوبصورت امتزاج ہے۔
وزیراعلیٰ پنجاب مریم نواز شریف نے مسیحی برادری کو ایسٹر کی مبارکباد دیتے ہوئے کہا کہ ایسٹر کا تہوار خوشیاں تقسیم کرنے کا دن ہے، مسیحی برادری امن پسند اور قابلِ احترام ہے، پاکستان کی ترقی میں مسیحی برادری کا کردار قابل ستائش ہے۔
اس کے علاوہ چیئرمین پیپلز پارٹی بلاول بھٹو نے کہا کہ ایسٹر کا امید، تجدید کا پیغام سیاسی میدان میں بھی اہمیت کا حامل ہے، مسیحی برادری کی غیر متزلزل حب الوطنی پر فخر ہے، ان کی مختلف شعبوں میں گراں قدر خدمات ہیں۔
