کراچی میں لٹیروں سے اب مساجد بھی محفوظ نہیں۔ مسلح افراد نمازیوں کو لوٹ کر فرار ہو گئے۔
تفصیلات کے مطابق کریم آباد کے علاقے میں ڈاکو مسجد میں گھس گئے اور اسلحے کے زور پر تین افراد کو لوٹ لیا۔ ڈاکوؤں نے مؤذن، مسجد کے خادم اور نمازی سے موبائل اور قیمتی سامان لوٹ لیا اور فرار ہوگئے۔
واردات کی سی سی ٹی وی فوٹیج سامنے آ گئی ہے جس میں ڈاکوؤں کو لوٹ مار کرتے ہوئے دیکھا جا سکتا ہے۔ بےخوف ڈاکو واردات کے بعد باآسانی فرار ہو گئے۔
دوسری جانب کراچی کے علاقے ناظم آباد میں بزرگ خاتون سے پرس چھینے کی سی سی ٹی وی ویڈیو سامنے آ گئی۔
شاہینہ سہیل نامی خاتون کے ساتھ آج ناظم آباد میں رہزنی کا واقعہ پیش آیا۔ سی سی ٹی وی فوٹیج میں دیکھا جا سکتا ہے کہ ڈاکو چلتی بائیک سے خاتون سے پرس چھینتے ہوئے فرار ہوئے۔
شاہینہ سہیل پرس چھینے جانے کے بعد اپنا توازن برقرار نہ رکھ سکیں اور بُری طرح گرِ پڑیں جس کی وجہ سے ان کے سر پر شدید چوٹیں آئیں اور انہیں تشویشناک حالت میں اسپتال منتقل کیا گیا۔
