اسلام آباد : قومی احتساب بیورو (نیب) نے سابق وزیر اعظم نواز شریف کو توشہ خانہ ریفرنس سے بری کرنے کی استدعا کردی اور کہا انھوں نے گاڑی توشہ خانہ سے نہیں بلکہ وفاقی ٹرانسپورٹ پوول سے خریدی۔
تفصیلات کے مطابق سابق صدر آصف علی زرداری، نواز شریف، یوسف رضا گیلانی کیخلاف توشہ خانہ گاڑیوں سے متعلق ریفرنس میں اہم پیش رفت سامنے آئی۔
نیب نے سابق وزیر اعظم کو ریفرنس سے بری کرنے کی استدعا کرتے ہوئے سابق وزیر اعظم نواز شریف کو شامل تفتیش کرنے سے متعلق عدالتی احکامات پر عملدرآمد رپورٹ جمع کرا دی۔
رپورٹ میں بتایا گیا سعودی عرب حکومت کی جانب سے 1997 میں گاڑی اس وقت کے وزیر اعظم کو تحفے میں دی گئی،انھوں نے تحفے میں ملی گاڑی کو توشہ خانہ میں جمع کروا دیا گیا تاہم بعد ازاں تحفے میں ملی گاڑی کو وفاقی ٹرانسپورٹ پوول میں شامل کر لیا گیا تھا۔
نیب کا کہنا تھا کہ 2008 میں اس وقت کے وزیر اعظم یوسف رضا گیلانی نے نواز شریف کو گاڑی خریدنے کی آفر کی، نواز شریف نے گاڑی توشہ خانہ سے نہیں بلکہ وفاقی ٹرانسپورٹ پوول سے خریدی۔
سابق وزیراعظم نے گاڑی کی قیمت ادائیگی جعلی بینک اکاؤنٹ سے نہیں کی، انھوں نے تحفہ ملی گاڑی کو توشہ خانہ میں جمع کرایا، خریدتے وقت گاڑی توشہ خانہ کا حصہ نہیں تھی۔
رپورٹ میں استدعا کی گئی کہ عدالت سابق وزیراعظم کو توشہ خانہ ریفرنس سے خارج یا بری قرار دے سکتی ہے۔
