سڈنی: آسٹریلیا کے سمندرمیں شارک نے ایک نوجوان کو موت کے گھاٹ اتاردیا، ریسکیو پرماموراہلکاروں کے مطابق ساحل تک پہنچنے تک نوجوان جاں بحق ہوچکا تھا۔
پورٹ ڈگلس میں واقع روڈر نامی کھاڑی میں نہاتے وقت سترہ سالہ نوجوان پرشارک نے یکایک حملہ کردیا جس کے نتیجے میں اسکی ران کا اوپری حصہ شدید متاثرہوا اور وہ خون زیادہ بہہ جانے کے باعث اپنی جان سے ہاتھ دھو بیٹھا۔
ایمبولینس ذرائع کے مطابق انہیں ایک کال موصول ہوئی جس میں انہیں نوجوان کے زخمی ہونے کی اطلاع دی گئی، ایک بوٹ کے ذریعے اسے ساحل پرلایا گیا اس پورے عمل کے دوران اسے طبی امداد دی جاتی رہی لیکن وہ جانبر نہ ہوسکا۔
ماہرین کے مطابق آسٹریلیا کے پانیوں میں شارکوں کے حملے ویسے تو ایک معمول کی بات ہیں لیکن جیسے جیسے ’واٹراسپورٹس‘ عوام میں مقبول ہورہے ہیں ان حملوں کی تعداد بڑھتی جارہی ہے۔
گزشتہ اکتوبرمیں بھی ایک نوجوان شارکوں کے حمللے میں اپنے دونوں بازؤں سے ہاتھ دھو بیٹھا تھا جبکہ ستمبر کے مہینے میں ایک شخص کو اسکی بیوی کی آنکھوں کے سامنے شارک مچھلیوں نے ہلاک کردیا تھا۔