اسلام آباد: وفاقی وزیرِداخلہ چوہدری نثار علی خان نے لاہور میں پی ٹی آئی کے احتجاج پر ردعمل کا اظہار کرتے ہوئے کہا ہے کہ،’’بس اب بہت ہوگیا، ہم پرامن شہریوں کو لاقانیونیت اور غنڈہ گردی کے حوالے نہیں کرسکتے‘‘۔
پیر کے روز پریس کانفرنس میں صحافیوں سے گفتگو کرتے ہوئے ان کا کہناتھا کہ حکومت کافی عرصے سے پی ٹی آئی کے دھرنے اوراحتجاج کے معاملے پرنرمی سے کام لے رہی ہے لیکن اب حد ہوچکی ہے۔
انہوں نے کہا کہ معصوم اورپرامن شہریوں کو لاقانیونیت، غنڈہ گردی اور سینہ زوری کے سامنے لاوارث نہیں چھوڑا جاسکتا۔
چوہدری نثار نے کہا کہ وہ کل وزیراعظم میاں نوازشریف سے ملاقات کریں گے اور اس تمام معاملے سے متعلق اپنے تحفظات سے آگاہ کریں گے۔
انہوں نے برہمی کا اظہار کرتے ہوئے کہاکہ ،’’حکومت کو اب حرکت میں آنا ہی پڑے گا‘‘۔
انہوں نے مزید کہا کہ تحریکِ انصاف اپنے نظریات کی ترویج کا حق رکھتی ہے لیکن اسے دوسروںکے نظریات کا بھی احترام کرنا ہوگا۔
