کراچی: ڈیفنس خیابان جانباز میں نوجوان دوست کے ہاتھوں دوسرے دوست کے قتل کا مقدمہ درخشاں تھانے میں درج کرلیا گیا۔
تفصیلات کے مطابق کراچی کے علاقے ڈیفنس خیابانِ جانباز کے قریب فائرنگ کا واقعہ پیش آیا جس کے نتیجے میں ماں باپ کا اکلوتا بیٹا اور 2 بچوں کا باپ مقتول ہمایوں جاں بحق ہوگیا۔
اس واقعے کا مقدمہ درخشاں تھانے میں دوست ہمام جاوید کی مدعیت میں درج کر لیا ہے جس میں فہد خان کے خلاف قتل اور اقدام قتل کی دفعات شامل کی گئی ہیں۔
مدعی مقدمے کے مطابق ہم دوست احمد زمان، ثاقب، آصف اور فہد خان، ہمایوں داؤد کے ساتھ بیٹھے تھے، فہد خان اور ہمایوں داؤد میں تلخ کلامی ہوئی اور بات ہاتھاپائی تک پہنچی، ہم دوستوں نے معاملے کو حل کروایا اور جانے لگے۔
مقدمے کے متن کے مطابق احمد زمان، ہمایوں اور میں گاڑی میں بیٹھے کہ اچانک فہد نے آکر فائرنگ کردی، فہد کی فائرنگ سے میں اور ہمایوں زخمی ہوئے اور گھر کی طرف روانہ ہوگئے، ہم گاڑی میں تھے اچانک دوسری گاڑی نے سامنے سے ہٹ کیا جب دیکھا تو اس میں فہد تھا۔
مدعی مقدمہ نے بتایا کہ فہد گاڑی سے اترا اور ہمایوں پر تب تک فائرنگ کی جب تک وہ مرا نہیں، فہد خان فائرنگ کرنے کے بعد فرار ہوگیا جس کے بعد ہم ہمایوں کو پہلے نجی پھر جناح اسپتال لے کر گئے لیکن ہمایوں کا انتقال ہوچکا تھا۔
