کراچی: متحدہ قومی موومنٹ پاکستان (ایم کیو ایم) نے میئر کراچی مرتضیٰ وہاب کے حالیہ بیان پر سخت ردعمل کا اظہار کیا ہے۔
ایم کیو ایم کے اراکین سندھ اسمبلی کا کہنا ہے کہ مرتضیٰ وہاب کا بیان بے سروپا، لغو اور الزامات برائے الزامات ہیں، اگر پیپلز پارٹی کا طرز عمل تبدیل نہ ہوا تو ایوانوں کے ساتھ سڑکوں پر بھی احتجاج ہوگا۔
اراکین صوبائی اسمبلی نے کہا کہ پیپلز پارٹی رہنماؤں کی ڈھٹائی، نااہلی، کرپشن اور ڈاکو راج کی حمایت عوام پر ظاہر ہو چکی ہے، پورے پاکستان کے میڈیا نے دکھایا کہ کس طرح ان کے وزراء کی کی گاڑیوں میں اسلحہ اسمگل ہوتا ہے۔
انہوں نے کہا کہ مرتضیٰ وہاب ماضی میں کراچی میں اغوا برائے تاوان بھتہ خوری اور ٹارگٹ کلنگ کا ذکر کر رہے ہیں، انہی کے وزیر داخلہ نے لاکھوں اسلحہ لائسینس جاری کیے جس کی وجہ سے قتل و غارت کا بازار گرم ہوا۔
ایم کیو ایم کا کہنا تھا کہ 2012 اور 2013 میں گینگ وار کو لیاری اور پورے کراچی کی دیگر کچی آبادیوں میں امن کمیٹیوں کے نام پر کون سپورٹ کرتا تھا سب جانتے ہیں، گینگ وار کے دہشتگرد کھلم کھلا شہر کے تاجروں کو بھتہ خوری کی پرچیاں بھیجا کرتے تھے اور نہ ملنے پر قتل کر دیا کرتے تھے۔
سندھ پولیس کے بارے میں اراکین صوبائی اسمبلی نے کہا کہ پولیس کو پولیسنگ کے بجائے سیاست اور کرائم میں پیپلز پارٹی کے وزراء ملوث کر رہے ہیں۔
ایم کیو ایم نے مطالبہ کیا کہ گزشتہ 15 برس میں پولیس میں ہونے والی تمام بھرتیوں کی اسکروٹنی کی جائے، پیپلز پارٹی کے شرمناک طرز عمل پر ایم کیو ایم بھرپور آواز بلند کرتی رہے گی۔
