اسلام آباد: پاکستان پیٹرولیم ڈیلرز ایسوسی ایشن نے وفاقی حکومت کے پیٹرولیم مصنوعات کی ڈی ریگولائیزیشن کے منصوبے کو مسترد کر دیا۔

چیئرمین پیٹرولیم ڈیلرز ایسوسی ایشن عبدالسمیع خان نے اپنے بیان میں کہا کہ پیٹرولیم مصنوعات کو ڈی ریگولائیز کیا گیا تو ملک میں کاروبار بند کرنے پر مجبور ہوں گے۔ انہوں نے خبردار کیا کہ حکومت کے اس عمل سے مہنگائی کا طوفان آئے گا۔

عبدالسمیع خان نے کہا کہ ملک کے دور دراز علاقوں میں پیٹرولیم قیمتیں خوفناک حد تک بڑھ جائیں گی، 8 سال سے مصنوعات کی ڈی ریگولائیزیشن سے منع کرتے رہے ہیں۔

انہوں نے کہا کہ حکومت نے ای سی سی کو پیٹرولیم سیکٹر کو ڈی ریگولائیز کرنے کی تجاویز دی ہیں، حکومت نے وعدہ کیا تھا کہ وہ سیکٹر میں ڈی ریگولائیز نہیں کرے گی، اس سے حکومت عوامی تنقید سے بچنا چا رہی ہے۔

میڈیا رپورٹس کے مطابق حکومت عوامی تنقید سے بچنے کیلیے پیٹرولیم مصنوعات کی قیمتیں مقرر کرنے کا اختیار منتقل کرنا چاہ رہی ہے۔

اس سلسلے میں اوگرا کو ہدایت کی گئی ہے کہ 3 روز میں مصنوعات کی ڈی ریگولائیزیشن پر پریزنٹیشن پیش کرے۔ ڈی ریگولائیزیشن کے بعد آئل کمپنیاں مختلف علاقوں میں اپنی قیمتیں مقرر کرنے میں آزاد ہوں گی۔