پنجاب کے شہر فیصل آباد میں ایک گھر میں آتشزدگی کا واقعہ پیش آیا ہے جس کے نتیجے میں 3 بچے جھلس کر جاں بحق ہوگئے۔
تفصیلات کے مطابق فیصل آباد کے علاقے عامر ٹاؤن کے ایک گھر میں آگ لگنے سے3کمسن بہن بھائی بری طرح جھلس کر جاں بحق ہوگئے۔
ریسکیوحکام کا کہنا ہے کہ آگ لگنے سے2افراد زخمی بھی ہوئے جنہیں طبی امداد کیلئے الائیڈ اسپتال منتقل کردیا گیا، جاں بحق بچوں میں 6ماہ کی عنبر،6 سالہ ایمان اور 8سالہ ارسلان شامل ہے۔
جاں بحق بچوں کا باپ جعفر اور 3سالہ بہن نورفاطمہ شدید زخمی ہوگئے، زمیندار سلیم کے مطابق جعفر اپنی بیوی اور4بچوں کے ساتھ ایک کمرے کے مکان میں مقیم تھا، جعفر کام پرجاتے وقت کمرے کو تالا لگا کر جاتا تھا۔
زمیندار سلیم نے بتایا کہ جعفر کی بیوی اور بچے اسی کمرے ہی میں بند رہتے تھے، اس نے اندیشہ ظاہر کیا کہ شاید کمرے میں بچوں کے ماچس جلانے سے آگ لگی ہوگی۔
علاوہ ازیں عامر ٹاؤن میں آتشزدگی سے3 بچوں کی موت کے معاملہ پر آر پی او فیصل آباد ڈاکٹرعابد خان نے آتشزدگی کی انکوائری کیلئے کمیٹی تشکیل دیدی۔
ان کا کہنا ہے کہ آگ لگنے کے واقعے کی تمام پہلوؤں سے تفتیش کی جارہی ہے، مذکورہ کمیٹی میں ایس پی مدینہ ڈویژن، اےایس پی پیپلز کالونی سرکل، ایس ایچ او تھانہ مدینہ ٹاؤن شامل ہیں
