کراچی: متحدہ قومی موومنٹ پاکستان (ایم کیو ایم) نے سندھ اسمبلی میں 14 قائمہ کمیٹیوں کی چیئرمین شپ مانگ لی۔
ذرائع نے اے آر وائی نیوز کو بتایا کہ اسپیکر سندھ اسمبلی قادر شاہ اور وزیر داخلہ سندھ ضیا الحسن لنجار سے ایم کیو ایم پاکستان کے وفد نے ملاقات کی، وفد میں اپوزیشن لیڈر سندھ اسمبلی علی خورشیدی، رکن افتخار عالم اور جمال احمد شامل تھے۔
ذرائع کے مطابق ملاقات میں صوبائی اسمبلی کی قائمہ کمیٹیوں کے حوالے سے تبادلہ خیال کیا گیا جہاں ایم کیو ایم پاکستان نے 14 قائمہ کمیٹیوں کی چیئرمین شپ دینے کا مطالبہ کیا۔
ایم کیو ایم پاکستان نے قائمہ کمیٹی برائے داخلہ، تعلیم، صحت، خزانہ، انڈسٹریز اور بلدیات کو اپنی ترجیحات میں رکھا ہے اور فہرست پیپلز پارٹی کی قیادت کے حوالے کر دی۔
ذرائع کا کہنا تھا کہ پیپلز پارٹی نے اس معاملے پر اعلیٰ قیادت سے مشاورت کے بعد جواب دینے کا کہا ہے جبکہ ایم کیو ایم کا کہنا تھا کہ ایوان میں دوسری بڑی جماعت ایم کیو ایم ہے اس لیے 14 قائمہ کمیٹیوں کی چیئرمین شپ ان کو ملنی چاہیے۔