کراچی: شہر قائد میں کھلی جگہوں اور نالوں میں کچرا پھینکنے پر 2 ماہ کی پابندی لگ گئی۔
تفصیلات کے مطابق کمشنر کراچی نے کھلی جگہوں میں کوڑا کرکٹ پھینکنے، نالوں میں ملبہ اور فضلہ ڈالنے پر 2 ماہ کی پابندی عائد کر دی ہے، پابندی کا اطلاق گزشتہ روز سے 14 جولائی تک ہوگا۔
متعلقہ تھانوں کے ایس ایچ اوز کو سیکشن 188 کے تحت کچرا ڈالنے والوں کے خلاف شکایت درج کرنے اور دفعہ 144 کی خلاف ورزی کرنے پر کارروائی کا اختیار بھی دے دیا گیا۔
سندھ سالڈ ویسٹ منیجمنٹ بورڈ کی جانب سے کراچی ڈویژن کے مختلف مقامات کھلے ہولز، نالوں میں کچرا، ملبہ اور فضلہ پھیکنے کی شکایات دی گئی تھی، جس کی وجہ سے ماحولیاتی آلودگی بڑھنے اور نالے بند ہونے کے خطرات بڑھ گئے تھے۔
سندھ سالڈ ویسٹ مینجمنٹ کی جانب سے شکایت کے بعد کمشنر کراچی نے نوٹس لیتے ہوئے پابندی عائد کی ہے، پابندی کے نوٹیفکیشن کی کاپی پرنسپل سیکریٹری، گورنر سندھ، وزیر اعلیٰ سندھ ، سیکریٹری داخلہ، رینجر، پولیس، میونسپل کمشنر کے ایم سی، واٹر کارپوریشن، چیف سیکریٹری اور تمام اضلاع کے ڈی سیز کو بھی ارسال کی گئی ہے۔
