اداکار ہمایوں سعید کا کہنا ہے کہ یمنیٰ زیدی کی توجہ میک اپ پر نہیں بلکہ اپنے کام پر ہوتی ہے۔
اداکار ہمایوں سعید کے حالیہ انٹرویو کا مختصر ویڈیو کلپ سوشل میڈیا پر وائرل ہورہا ہے جس میں وہ یمنیٰ زیدی کی اداکاری کی تعریف کررہے ہیں۔
اُنہوں نے کہا کہ یمنیٰ زیدی کو اُن کی شاندار اداکاری کی وجہ سے شہرت ملی ہے، جس طرح مداح یمنیٰ زیدی کا کام پسند کرتے ہیں، اُسی طرح مجھے بھی اُن کا کام بہت پسند آیا ہے۔
ہمایوں سعید نے کہا کہ میں نے یمنیٰ زیدی کے کام کے بارے میں کافی باتیں سُنی تھیں لیکن اب خود اُن کے ساتھ کام کرکے یقین آگیا ہے کہ وہ اپنے کام کو لیکر بہت سنجیدہ ہیں۔
اداکار نے کہا کہ یمنیٰ ڈرامے کی شوٹنگ پر ہمیشہ وقت پر آتی ہیں میں خود بھی اسی طرح کام کرتا ہوں، اسی لیے مجھے یمنیٰ جیسے اداکاروں کو محنت کرتا دیکھ کر بہت خوشی ہوتی ہے۔
انہوں نے مزید کہا کہ ڈرامے کا اسکرپٹ پڑھ کر یمنیٰ زیدی بھی راضی ہوگئی تھیں اور اُنہوں نے کہا کہ یہ اُن کے لیے چیلنجنگ کردار ثابت ہوگا۔
