لاہور: چوہدری پرویز الہٰی جیل سے رہائی کے بعد گھر پہنچے تو اہل خانہ نے ان کا گرمجوشی سے استقبال کیا، اہل خانہ کے ساتھ ان کی تصاویر بھی سامنے آ گئی ہیں۔
تفصیلات کے مطابق صدر پی ٹی آئی چوہدری پرویز الہٰی گزشتہ روز کوٹ لکھپت جیل لاہور سے رہا ہو گئے، رہائی کے بعد وہ ظہور الہٰی پیلس پہنچ گئے جہاں اہلیہ اور دیگر افراد نے ان کا استقبال کیا۔
اپنے گھر میں چوہدری پرویز الہٰی کی اہل خانہ کے ساتھ تصویریں بھی سامنے آ گئی ہیں، جن میں وہ جیل اور عدالتی پیشیوں کی تکالیف کے بعد پرسکون اور مطمئن دکھائی دیتے ہیں۔ 78 سالہ پرویز الہٰی کو محض بانی پی ٹی آئی کا ساتھ دینے اور منحرف نہ ہونے کے جرم پر اس عمر میں بھی سخت ذہنی و جسمانی اذیت دی گئی۔
پرویز الہٰی نے اس موقع پر کہا ’’میری گرفتاری اور ظلم میں سب سے اہم کردار محسن نقوی کا رہا، میں بانی پی ٹی آئی کے ساتھ تھا، ہمیشہ رہوں گا، میں ثابت قدم رہا، ججوں نے حق اور سچ کا ساتھ دیا۔‘‘
پرویز الہٰی کوٹ لکھپت جیل سے رہا
’شجاعت صاحب کے بچوں سے مینڈیٹ واپسی تک کوئی بات نہیں ہو گی‘
انھوں نے کہا کہ گجرات کے لوگوں کو زیادتیاں اور ظلم سہنا پڑا، ہمارا مینڈیٹ چرایا گیا، چوہدری شجاعت کے بچوں سے مینڈیٹ کی واپسی تک کوئی بات نہیں ہوگی۔ واضح رہے کہ لاہور ہائیکورٹ نے پنجاب اسمبلی بھرتی کیس میں پرویز الہیٰ کی درخواست ضمانت منظور کر لی ہے، پولیس نے صدر پی ٹی آئی کو اکتوبر 2023 میں گرفتار کیا تھا۔
