اسلام آباد: پی ٹی آئی رہنما حماد اظہر کا کہنا ہے کہ کل بانی پی ٹی آئی کا پیغام ملا ہے کہ آپ کے باہر آنے کا وقت ہوگیا ہے۔
اے آر وائی نیوز کے مطابق حماد اظہر کی تحریک انصاف کے مرکزی سیکریٹریٹ آمد ہوئی اس دوران انہوں نے میڈیا سے گفتگو کرتے ہوئے کہا کہ پشاور جاکر قبل از گرفتاری ضمانت لے کر عدالت میں پیش ہوں گا۔
صحافی نے سوال کیا کہ مراد سعید جلد منظر عام پر آئیں گے؟َ حماد اظہر نے جواب دیتے ہوئے کہا کہ میرا مراد سعید سے کوئی رابطہ نہیں ہے۔
صحافی نے سوال کیا کہ کیا باقی روپوش لوگ بھی باہر آئیں گے؟ حماد اظہر نے کہا کہ پی ٹی آئی کے تمام روپوش رہنما باہر آئیں گے۔
انہوں نے کہا کہ ظلم اور جبر کے سامنے نہیں جھکیں گے، رؤف حسن پر حملے کے بعد بانی پی ٹی آئی کا پیغام ملا، مفروری کے دوران بھی مجھے دھمکیاں ملی تھیں، پاکستان کو اس نوبت پر لے آئے ہیں کہ اب حملے ہورہے ہیں۔
حماد اظہر نے کہا کہ مجھے یہ کہا گیا کہ اگر میں پکڑا گیا تو مجھ پر تشدد ہوگا، میں ہر چیز کے لیے تیار ہوں۔
