کراچی: غیر ملکی کمپنیوں نے اپریل 2024 میں 5 کروڑ 66 لاکھ ڈالر منافع اور ڈیوڈنٹ ہیڈکوارٹرز منتقل کیا۔
ذرائع کے مطابق غیر ملکی کمپنیوں کی جانب سے اپنے ہیڈکوارٹرز منتقل کیے جانے والے منافع اور ڈیوڈنٹ میں نمایاں اضافہ دیکھنے میں آیا ہے۔
اپریل 2023 میں غیر ملکی کمپنیوں نے صرف 77 لاکھ ڈالر منافع باہر منتقل کیا تھا، جب کہ رواں برس گزشتہ ماہ 5 کروڑ 66 لاکھ ڈالر منافع اور ڈیوڈنٹ ہیڈکوارٹرز منتقل کیا گیا۔
اسٹیٹ بینک کا کہنا ہے کہ اس نے 2022 تک کے تمام منافع اور ڈیوڈنٹ ادا کر دیا ہے، اور آہستہ آہستہ 2023 کا منافع اور ڈیوڈنٹ بھی ادا کر رہا ہے۔ اسٹیٹ بینک کے مطابق ملکی زرمبادلہ ذخائر بہتری کے بعد 9 ارب 15 کروڑ ڈالر تک ہو چکے ہیں۔
ذرائع کے مطابق گزشتہ 10 ماہ میں غیر ملکی کمپنیاں 88 کروڑ 71 لاکھ ڈالر کا منافع اور ڈیوڈنٹ باہر بھیج چکی ہیں، 22-2023 کے 10 ماہ میں غیر ملکی کمپنیوں نے صرف 25 کروڑ 34 لاکھ ڈالر باہر بھیجا تھا۔
