اسلام آباد : محکمہ موسمیات نے رواں سال جون تا اگست ہونے والی مون سون بارشوں کے حوالے کی پیش گوئی کرتے ہوئے خطرے کی گھنٹی بجادی۔
تفصیلات کے مطابق محکمہ موسمیات نے رواں سال ملک بھر میں جون تا اگست مون سون بارشوں پر آؤٹ لک جاری کردیا۔
محکمہ موسمیات کا کہنا ہے کہ جون تا اگست ملک کے بیشتر مقامات پرمعمول سے زائد بارشوں کاامکان ہے، وسطی اور شمالی پنجاب میں معمول سے زائد بارشوں کا زیادہ امکان ہے۔
محکمہ موسمیات نے جنوبی سندھ میں بھی معمول سے زائد بارشوں کی پیشگوئی کرتے ہوئے کہا ہے کہ بلوچستان میں بھی معمول سے کچھ زیادہ بارشیں متوقع ہیں جبکہ کے پی اور گلگت بلتستان میں معمول کے مطابق بارشیں ہوگی۔
آؤٹ لک میں کہا ہے کہ مون سون سیزن کے دوسرے مرحلے میں پہلے مرحلے سے زائد بارشوں کا امکان ہے، جس سے زائد درجہ حرارت سے بالائی کے پی، کشمیر ،جی بی میں برف پگھلنے کاعمل تیز ہوسکتا ہے۔
ملک کے اکثر مقامات پر جون کے آغاز میں درجہ حرارت معمول سے زائد ہوگا اور بارشوں کے بعد درجہ حرارت معمول پر آجائیں گے۔
آؤٹ لک کے مطابق مون سون کے دوران آندھی اور تیز ہوائیں چلیں گی، زائد بارشوں کے سبب دریاؤں میں سیلابی صورتحال ہوسکتی ہے جبکہ شہروں میں اربن فلڈنگ کا بھی خدشہ ہے جبکہ کوہ سلیمان سمیت دیگر پہاڑی علاقوں میں بھی سیلابی ریلوں کا خدشہ ہے۔
