وزیر اطلاعات سندھ شرجیل میمن نے سرکاری ملازمین کے لیے خوشخبری سناتے ہوئے کہا ہے کہ وہ قسطوں پر پلاٹ حاصل کرسکیں گے۔
تفصیلات کے مطابق شرجیل انعام میمن کا کہنا تھا کہ سرکاری ملازمین کیلئے حکومت سندھ ہاؤسنگ سوسائٹیز بنانے جارہی ہے، اب سرکاری ملازمین کم قیمت پر قسطوں پر پلاٹ حاصل کرسکیں گے، ہم نے صحافیوں کو بھی پلاٹس دیے ہیں۔
انھوں نے کہا کہ لو گریڈ اور اپر گریڈ سرکاری ملازمین کیلئے یہ اسکیم ہوگی، پولیس، ٹریفک پولیس کے محکمے بھی اسکیم میں شامل ہیں۔
پیپلز پارٹی کے مرکزی رہنما نے کہا کہ پاکستان اسٹیل مل کو بند نہیں کیا جائیگا اور نہ پرائیویٹائز کیا جائےگا، اسٹیل مل کی زمین پر سندھ حکومت ایکسپورٹ پروسیسنگ زون بنانے جارہی ہے، وفاق اور سندھ حکومت مل کر پاکستان اسٹیل مل کو چلائیں گے۔
انھوں نے کہا کہ ایکسپورٹ پروسیسنگ زون کی کمائی سے اسٹیل مل کو پیروں پر کھڑا کیا جائےگا، پیپلز پارٹی چاہتی ہے کہ گورننس مزید بہتر ہو، سرکاری ملازمین اچھے ماحول میں کام کرسکیں۔
شرجیل میمن نے کہا کہ کراچی میں الیکٹرک بسوں کے نئے روٹس کی کابینہ نے منظوری دی ہے، کراچی میں مزید الیکٹرک بسیں سڑکوں پر چلائی جائیں گی، کراچی کو 8 ہزار بسوں کی ضرورت ہے۔
وزیراطلاعات سندھ نے کہا کہ سالڈویسٹ مینجمنٹ سندھ بھر میں اپناکام کررہا ہے، بلڈرز گھروں کا ملبہ سڑکوں پر پھینک دیتے ہیں، اب اگرکسی نے ملبہ سڑک پر پھینکا تو ایکشن لیا جائےگا، کبھی کبھی وہ ملبہ نالوں میں پھینک رہے ہوتے ہیں۔
انھوں نے کہا کہ وزیراعلیٰ نے پولیس ڈیپارٹمنٹ سے نظر رکھنے کو کہا ہے، پولیس کو ہدایت دی ہے کہ جو ملبہ پھینکتا نظر آئے گرفتار کیا جائے۔
شرجیل میمن نے کہا کہ سندھ میں ون اسٹاپ ون شاپ کے ڈیجیٹل پلان کی منظوری دی ہے، سندھ میں کل 48 محکمے ہیں جن میں سے 16 کو ڈیجیٹلائز کرنے جارہے ہیں، ان محکموں کا کام آن لائن ہوگا ورلڈ بینک کی مدد سے یہ پراجیکٹ مکمل کیا جائے گا۔ اسی سال 16 محکمے ڈیجٹلائز ہوجائیں گے۔
انھوں نے کہا کہ فوڈ، ہیلتھ ، انوائرمنٹ، لیبر، ریونیو اور زراعت کے محکمے ڈیجیٹلائز ہوجائیں گے، بلڈنگ کنٹرول اتھارٹی اور لوکل گورنمنٹ بھی ڈیجیٹلائز ہوجائیں گے۔
وزیراعلیٰ سندھ کی جانب سے محکموں کو کہا گیا ہے کہ قوانین جلدازجلد بنالیں، ملیر ایکسپریس وے پر 100 ایکڑ زمین اسپیشل چلڈرن کیلئے دی جارہی ہے، ملیر ایکسپریس وے پر اسٹیٹ آف دی آرٹ انسٹیٹیوٹ بنایا جارہا ہے۔
شرجیل میمن نے کہا کہ ہمارےاسپیشل بچوں کیلئے پورے ملک میں اسپیشل اسپتال نہیں ہے۔ اسپیشل بچوں کے لئے فزیکل اسپتال، اسکول اور پلے گراؤنڈ بھی ہوگا۔
انھوں نے کہا کہ الیکٹرک گاڑیوں کی رجسٹریشن کا مسئلہ چل رہا تھا، الیکٹرک گاڑی جسے بھی رجسٹرڈ کرانی ہے اپنے صوبے سے کرا سکتا ہے، آج سے ڈیڑھ سال قبل ہم 50 ای وی بسز لیکر آئے تھے، ہمارے پلان بہت بڑے ہیں بجٹ نے اجازت دی تو 8 ہزار بسز تک بھی جاسکتے ہیں۔ ای وی بسزبہت مہنگی ہیں مگر ماحول دوست ہوتی ہیں۔
