اسپین، ناروے اور آئر لینڈ کے بعد اب یورپی ریاست سلووینیا کی حکومت نے بھی فلسطین کوتسلیم کرنے کی منظوری دے دی۔
غیر ملکی ذرائع ابلاغ کے مطابق سلووینین وزیراعظم رابرٹ گولوب نے دارالحکومت لیوبلیانا میں پریس کانفرنس کرتے ہوئے کہا کہ فلسطین کو آزاد اور خود مختار ریاست کے طور پر تسلیم کرنیکا فیصلہ کیا ہے۔
انہو ں نے کہا کہ سلووینیا یورپی یونین کا رکن ملک ہے، فلسطین کوآزاد ریاست تسلیم کرنے کے فیصلے کی منظوری پارلیمنٹ سے لی جائیگی۔
سلووینین وزیراعظم رابرٹ گولوب کا مزید کہنا تھا کہ سلووینیا کا یہ اقدام اسپین، آئرلینڈ اورناروے کی جانب سے فلسطین کوآزاد ریاست تسلیم کرنے کے اقدام کی پیروی ہے۔
دوسری جانب یورپی ممالک کی جانب سے فلسطینی ریاست کو تسلیم کرنے پر اسرائیلی حکام میں غصے کی لہر دوڑ گئی، فلسطینی اتھارٹی کے زیر انتظام مغربی کنارے میں یہودی آبادکاروں کو بھیجنے کا فیصلہ کرلیا۔
رپورٹ کے مطابق اسرائیلی وزیر دفاع نے اعلان کیاہے کہ صنور، گنیم کی قدیم بستیوں کی جانب یہودیوں کو رہائش فراہم کی جائے گی۔ فلسطینی شہروں جنین اور نابلس کے قریب یہودی آباد کاروں کو بسایا جائے گا۔
گزشتہ سال سے یہودی آباد کاروں کے فلسطینی گھروں پر قبضوں میں تیزی آئی تھی، مغربی کنارے کے متعدد علاقوں کو 2005 میں اسرائیل نے یہودی آبادکاروں سے خالی کروالیا تھا۔
میکسیکو میں اسرائیلی سفارتخانے کے سامنے رفح آپریشن کیخلاف شدید احتجاج
فلسطینی اتھارٹی کا کہنا ہے کہ یہودی آبادکاروں کو کھلی چھوٹ دینے کے فیصلے سے کشیدگی بڑھے گی، اسرائیلی فورسز یہودی آبادکاروں کو روکنے کی کوشش سے گریز کرتی رہی ہیں۔
