اسلام آباد : آئی ایم ایف نے ایک بار پھر وزرا،ارکان پارلیمنٹ اورسرکاری افسران کے اثاثے پبلک کرنے مطالبہ کردیا اور کہا اثاثے ظاہرکرنے پر سختی سے عملدرآمد کرایا جائے۔
تفصیلات کے مطابق آئی ایم ایف نے آئندہ بجٹ میں انسداد بدعنوانی کیلئے سخت اقدامات کرنے کی تجویز دے دی اور عوامی عہدہ رکھنے والوں ،سرکاری افسران کے اثاثے پبلک کرنے کا مطالبہ دوبارہ کردیا۔
عالمی مالیاتی فنڈ نے کرپشن کے خاتمے کے لیے اپنا موقف دہراتے ہوئے کہا کہ وزرا،ارکان پارلیمنٹ ، سرکاری افسران کے اثاثے ظاہرکرنے پرسختی سےعملدرآمدکرایاجائے۔
ذرائع نے بتایا کہ وفاقی حکومت اثاثے عوامی سطح پر ظاہر کرنے کیلئےپورٹل بنانے میں ناکام ہے ، بین الاقوامی مالیاتی ادارے نے پورٹل نہ بنانے پر حکومت پاکستان سے اظہار ناراضگی کیا۔
ذرائع کا کہنا ہے کہ پاکستانی حکام معاہدہ کے تحت پورٹل بناکر اثاثوں کی تفصیلات عام کرنےکےپابندہیں، آئی ایم ایف نےکابینہ ارکان،ارکان اسمبلی،افسران کے اثاثےعام کرنے کی ہدایت کررکھی ہے۔
ذرائع کے مطابق حکومت نے عالمی مالیاتی فنڈ کی ہدایت پر افسران کیلئےایک پرفارمہ بنایا تھا، بینک سرکاری افسران سے نئے اکاؤنٹ کھولتے وقت اثاثوں کی معلومات لینے کے پابند ہیں۔
