لاہور: جناح اسپتال لاہور کے سابق ایم ایس ڈاکٹر امجد محمود پیٹ میں گولی لگنے سے شدید زخمی ہو گئے ہیں۔
تفصیلات کے مطابق لاہور کے علاقے نواب ٹاؤن میں فائرنگ سے سابق ایم ایس جناح اسپتال ڈاکٹر امجد محمود زخمی ہو گئے، پولیس حکام کا کہنا ہے کہ فائرنگ کا واقعہ ڈاکٹر امجد کے گھر پر پیش آیا۔
پولیس حکام کا کہنا ہے کہ سابق ایم ایس کو ڈکیتی مزاحمت پر ڈاکوؤں نے گولی مار کر زخمی کیا ہے، دو نا معلوم ڈکیت ڈاکٹر امجد محمود کے گھر میں داخل ہوئے، آواز سن کر ڈاکٹر امجد اٹھے تو ڈاکوؤں نے فائرنگ کر دی، ڈاکٹر امجد پیٹ میں گولی لگنے سے زخمی ہو گئے۔
پولیس ذرائع کے مطابق زخمی ڈاکٹر امجد محمود جناح اسپتال میں زیر علاج ہیں، واقعے سے متعلق تفتیش جاری ہے، قریبی علاقوں کے سی سی ٹی وی کیمروں کی فوٹیجز حاصل کی جا رہی ہیں، جب کہ ڈاکٹر امجد کے ہوش میں آنے کے بعد ان کا بیان قلم بند کیا جائے گا، فرانزک ٹیموں کی مدد سے شواہد بھی جمع کر لیے گئے ہیں۔
