اسلام آباد: وزیر خزانہ محمد اورنگزیب نے بجٹ میں پنشن پر ٹیکس نہ لگانے سے متعلق آئی ایم ایف کو راضی کرلیا۔
اے آر وائی نیوز کے مطابق پاکستان اور آئی ایم ایف ٹیم کے درمیان ورچوئل مذاکرات ہوئے جس میں کاروباری اور تنخواہ دار طبقے پر یکساں ٹیکس لگانے کی تجاویز پر غور کیا گیا۔
ذرائع کا بتانا ہے کہ مذاکرات میں آئی ایم ایف کو یکساں ٹیکس پر متعدد تجاویز پیش کی گئیں۔
فریقین نے ٹیکس تجاویز پر ورچوئل مذاکرات جاری رکھنے پر اتفاق کیا ہے جبکہ پاکستانی حکام آئی ایم ایف سے مذاکرات پر وزیراعظم شہباز شریف کو بریفنگ دیں گے۔
واضح رہے کہ ایف بی آر نے آئی ایم ایف کی ہدایت پر ٹیکس لگانے کی تجاویز تیار کی تھیں۔
یاد رہے کہ چند روز قبل آئی ایم ایف اہداف پورے کرنے کیلئے ترقیاتی بجٹ پر ہر سال کٹوتی کا انکشاف ہوا تھا۔ رواں سال 950 ارب کے ترقیاتی بجٹ میں سے صرف 379 ارب استعمال ہوئے۔
بجٹ کٹوتی سے صحت، اعلیٰ تعلیم سمیت سماجی شعبے، انفرااسٹرکچر کے کئی منصوبے متاثر ہوئے ہیں۔
پی ایس ڈی پی کے پہلے سے جاری منصوبوں کیلئے 9ہزار 800 ارب روپے درکار ہے جب کہ آئندہ مالی سال کیلئے 1221 ارب روپے کا وفاقی پی ایس ڈی پی تجویز ہے۔
دستاویز کے مطابق گزشتہ 10 سال میں وفاقی ترقیاتی بجٹ سالانہ اوسطاً 630 ارب روپے ریکارڈ ہوا تاہم روپے کی قدر میں نمایاں کمی اور مہنگائی کی وجہ سے بھی ترقیاتی بجٹ متاثر ہوئی۔
وفاق نے صوبائی نوعیت کے منصوبوں کو بجٹ پر بھاری بوجھ قرار دیا۔ ترقیاتی بجٹ جی ڈی پی کے لحاظ سے 1.7 فیصد کم ہو کر 0.9 فیصد پر آگیا، پرائمری خسارہ پورا کرنےکیلئےوفاقی ترقیاتی بجٹ پر کٹ لگایا جاتا ہے۔
